Aizawl : BJP Mizoram President Vanlalhmuaka chuan Manipur state-a chi leh chi buaina chungchang emaw, Uniform Civil Code (UCC) emaw, a tak tak engmah la awm si lo hlauh tur inzirtir ai chuan state hmasawnna ngaihtuah turin Mizoram mipui a sawm.
Nimina BJP Mizoram-in an pisa-a chhung inkhawm an neihah Vanlalhmuaka chuan kumin inthlanpui lo awm turah ‘a hmasa berah Mizoram’ tih chu an thupui a ni dawn tih sawiin, “Kan state harsatna sutkian a, kan state-ah hmasawnna a thlen theihna turin hma kan la dawn,” a ti.
Vanlalhmuaka chuan kumin MLA inthlanpuia BJP manifesto pawimawh ber chu Mizorama mitinin an mamawh ang hmasawnna dik an chan theihna tura hmalak a nih thu sawiin, “State dangte buaina leh UCC emaw hi kan election manifesto a ni ve dawn lo,” a ti a. State buaina leh thil hlauh tur awm mang si lo, party dangte anga mipuite hlauh tur inzirtir chawpa inthlan lo awm tur hi an sual ve dawn lo va, state hmasawnna chu an thupui ber a ni dawn tih a sawi.
Manipur state chhunga chi leh chi buaina chungchang emaw, UCC chungchang emaw, a tak tak engmah la awm si lo hlauh tur inzirtir ai chuan state-in hmasawnna a chan theihna tur, ram leh hnam intodelhna tur lam hawi zawnga ngaihtuahna siam turin Mizoram mipuite a sawm tih sawiin, “Thenawm te leh thil awm rih lo te vei lo vin, mahni inchhung leh kan intodelh theihna lam i hawi zawk ang u,” a ti bawk.