Mexico in an ram chanchin a vawi 9 nan CONCACAF Gold Cup an chawi a. Final-ah 1-0 in Panama an hneh.
Thawhtanni zing final hi Los Angeles a SoFi Stadium-ah khelh a ni a. Huntawp dawn lam minute 88-naah Santiago Giménez chuan Mexico chakna goal a khung.
Mexico in counter-attack rang atangin goal an khung a. Edson Alvarez chuan an penalty area chhunga Ivan Anderson ball cross chu lo dang chatin Orbelin Pineda in ball a tlanchhuahpui a. Khelmual laia awm kum 22 mi Feyenoord striker Gimenez hnenah ball duhthusam pe in ani in goal-ah a tlanpui a. Panama centre-half pahnih Harold Cummings leh Fidel Escobar ten dang thei lovin ram tana a goal li na a khung.
Mexico hian minute 33-naah Henry Martin hmangin goal khung mahse offside avanga pawm a ni lova. Panama keeper Orlando Mosquera chuan an goal khung ngei tura lang vawikhat tha takin a dansak bawk.
Panama in chance an neih that ber hi goal an chhuah hma chiahin a ni ve thung a, Edgar Barcenas chuan penalty area pawn atangin goal a khung teuh.
Mexico in vawi kua Gold Cup an la thei hi CONCACAF record a ni a, anni aia chawi hnem an la awm lo.
Mexico interim coach Jaime Lozano chuan, “Kan inkhel boruak kha a sang a, Gold Cup pawh a ang lo, World Cup stage sang a inkhel kan ang zawk.” tiin a sawi a. Lozano hian thla hmasa khan Mexico hi a enkawl tan chauh a, team talbuai a hlawhtlinpui nghal.
“Gold Cup atan contract ka ziak a, tunah hian free agent ka ni ah ka inngai, national team tana thawh hi ka inpeih reng.” tiin a sawi.