Assembly speaker Lalrinliana Sailo chuan MLA inthlanpui lo awm turah MNF party atangin ticket a chan lohna chhan tur a awm lo tih a sawi a; tuna a awm mekna party chhungkua atangin beihna a tawh nasat thu a sawi.
The Zozam Times-in a kawmnaah Rina Sailo chuan kumin MLA inthlanpuiah a din leh dawn leh dawn loh chungchang zawhna chhangin, “Pathian leh kan hotute thu thu a ni mai,” a ti a, MNF party-ah ticket a chan lohna tur a awm loh thu a sawi a; tuna a bial, Chalfilah candidate a ni leh a nih chuan a khingpuite chu vote 1,200 atanga 1,500 chuan a hneh a rin thu a sawi.
Assembly spekaer chuan a party awmna ngei atangin beihna a tawh nasat thin thu a sawi a, Congress party-a a awm lai pawhin an chhungkua atanga nasa taka beihna a tawh thu leh chumi avanga chhuak a nih thu a sawi.
Tuna a awm mekna, MNF party-ah pawh beih a tawk tih sawiin, “Tunah pawh hian chief minister leh deputy chief minister te hi chuan min pawm thain min hmangaih hlein ka hria a, min rawn level ve tumte erawh chuan min bei tak tak,” a ti a, tun hnaia mi mal taka hminghliau theihna beihna a tawhah pawh chhung lam atanga beihna a tel a rin hmiah thu a sawi a ni.
Rina Sailo chuan USA-a a zin tuma deputy chief minister department chan pakhata Rs. nuai 100 ziah bo chungchang a sawi chhuahah deputy chief minister chu ei ru-ah a puh lo a, department-te thil tih dik lo zawk sawi chhuak a nih thu a sawi a, he thil hi thu dik a nih miau avangin a thu sawi avangin an hruaituten an khak a ring lo a, ti tha an tih zawk a rin thu te, sum tihchingpen chungchangah hian an hotuten a titu an zawn chhuaha action an lak ngei a rin thu a sawi bawk a ni.