Carlos Alcaraz chuan Wimbledon men’s singles title a vawikhatna atan a la a. Novak Djokovic nen final hmuhnawmah inkhelin hnehna a chang.
Kum 20 mi Alcaraz hian 1-6 7-6 (8-6) 6-1 3-6 6-4 a hnehna chang turin tunhnaia All England Club a inelna thununtu Djokovic hi a hneh a. Champion lai in a tawp thlengin bei viau mahse hnehna a sual chhuak zo lo.
Djokovic hian a zawna Wimbledon title vawi nga na lak tumin final a khel a. Hlawhtling se Wimbledon-ah vawi 8 a champion-na a ni dawn a, Roger Federer a tluk chiah ang. Hei bakah hian a Grand Slam title 24-na a ni anga, record thar a ni ang.
Mahse kum 36 mi hian Alcaraz a ngam lova. Spanish tlangval hian a Grand Slam title pahnihna la turin a ‘class’ a lantir.
Final hmuhnawm
Tennis season a grass court inelna lian, inelna ngaihhlut ber Wimbledon mipa final ah world number one leh world number two an inkhel a. Tennis hmuhnawm beisei a ni a, a thlawn lo chiang.
Hlawhtlin duh ve ve pahnih an ni a, an inkhelah pawh a chan tha zawk nih an inchhawk fo.
Djokovic-a’n Margaret Court-i 24 lak record tluk tumin a bei a. Kuminah Australian Open leh French Open a la tawh a, Wimbledon-ah chak ngei a tum.
Lehlamah Alcaraz-a’n chhuan tharte hun a inherchhuak a, tennis thununtu lian pathumte hun a liam mek zel a ni tih a lantir.
French Open final-ah Djokovic lakah a zam chhe hle a, tun tumah pawh set khatna minute 34 chhungin Serbian star in a la.
Mahse Alcaraz-a’n a puitlin tawhzia tilangin a insiamtha a. Set hnihna leh thumna la in huaisen takin a khel a. Ball vuak dik loh a neih chang pawhin inrintawkna a tlakchham phah lo.
Set li-naah Djokovic nen inbei viau mahse inkhel tawp lamah Serbian star, chiai ngai lo thin zawk chuan tihsual a nei leh thin a. Set hnuhnung berah Alcaraz hian a service vawikhat break sakin Djokovic hian a break let ve thei lo.
“A tak ram a chang ta”
“Ka lo suangtuah thin chu a tak ram a chang ta. Tlawm pawh ni ila ka thlen chin hi a ropui ka ti ngawt ang. Kum 20 mi lekin hetiang hun ka thleng thei hi ka tum ram ka thleng hma hle ah ka ngai. Ka lawm hle a ni.” tiin Alcaraz chuan a chak hnuah a sawi.
Djokovic chuan, “Tlawm hi tuman kan duh lo, mahse ni han liam se, lawmna tur ka nei tih ka hmu ang. Helaiah hian inkhel hautakah ka chak fo tawh a, ka tlawm hun a thleng ve a ni mai.” a ti.