I-N-D-I-A – Indian National Developmental Inclusive Alliance tih chu nakum India inthlanpui lo awm tura BJP leh a tanrualpui, National Democratic Alliance (NDA) pheh thluk tuma eptu party 26 tangrualte chuan hming thar atan an pu dawn ta.
Bengaluru khawpuia an thutkhawmah he hming thar hi pawmin Congress hruaitu, Rahul Gandhi chuan kum 2024 inthlanpui chu ‘Modi versus I.N.D.I.A’ a ni dawn tih a sawi.
“Ram danpui hi kan chhan dawn a, Indian-te leh India ngaihdan humtu turte kan ni. India ngaihdan chu inhria a, NDA leh I.N.D.I.A, Narendra Modi leh I.N.D.I.A, a duh dan leh I.N.D.I.A inbeihna a ni dawn a. India hian heng inbeihnaah hian hnehna a chang reng ang,” a ti.
Gandhi-a chuan, “Inbeihna hi ngaihdan inang lo pahnih insualna tur a ni a. Ramin aw a neih chu hup a ni a, ramin aw a neih nan beihna a ni a. A hming atan I.N.D.I.A tih thlan a ni,” a ti bawk.
BJP pawh an thawhpuite nen Thawhlehni vek khan Delhi-ah an thukhawm ve a. BJP hruaitu, Amit Malviya chuan UPA inhlawm khawm thar leh chu an hming an thlak mai niin a sawi.
“Kum 2024-ah hian Prime Minister Modi, hruaitu tha chu thlan a ni leh dawn a. Kan ram hmabak hi mahni inhai vur, ei ru leh inthlah chhawng party hnuaia awm atan chuan a uiawm lutuk. An inpun khawm leh pawh hi mipuite tan ni lovin, anmahni thatna tur a ni,” tiin Twitter-ah a tar lang.
Eptu party tangrualte hian Thawhtannia an thutkhawm hnuah a ni hnihnaah an hming thar tur hi an puang.
Left party thenkhat chuan ‘Alliance’ tih thumal chu ‘Front’ tia thlak an duh a, party thenkhatin ‘NDA’ nen a inzul lutuk niin an sawi bawk a. Shiv Sena UBT chief Uddhav Thackeray-a’n party mal bik hming tumah lang lovin a hming neih a rawt bawk.
A tawpah Gandhi-a’n tuna an hming hi a rawt chhuak ta niin Nationalist Congress Party hruaitu, Jitendra Ahwad chuan Twitter-ah a tar lang a. “A ngaihtuahna a fakawm hle,” a ti.
Hming thar pan a nih hnu lawkah hian ‘Chak de India,’ tiin Trinamool Congress hruaitu, Derek O’Brien chuan Twitter-ah a tar lang nghal a. “NDA, INDIA hi i cho dawn em? BJP, nang pawhin INDIA hi i cho em?” tiin a boss, Bengal Chief Minister Mamata Banerjee-i chuan a tar lang bawk.
An thutkhawm zawhah Congress chief Mallikarjun Kharge chuan, “BJP hian mipui rorelna, danpui tihchhiat an duh a, autonomous body thenkhat pawh eptu hruaitute leh an worker te tihthaih nan an hmang a. He kan ram dinhmun hi siam tha turin kan kal khawm a, engtin nge ram leh mipuite hi kan chhan ang, chu chu kan hmaa tih tur awm chu a ni,” a ti.
An tanhona chu tunge kaihruai danw tih zawhna pawh Kharge chuan, “Mi 11 telna coordination committee kan din a. Mumbai-a kan thutkhawm hunah an zinga mi nge ni ang tihfel a ni ang a, tu nge convenor ni ang tih leh a dang pawh tihfel a ni ang, chu lam chu a tenau lutuk,” a ti.
Mamata Banerjee-i pawhin an thukhawm chu ‘thil tha, insiam thatna leh hlawk tak’ a nih thu a sawi a. Mumbai-a an thutkhawm lehah chuan Common Minimum Programme lam an thlurbing tur thu a sawi.
Eptute an thutkhawm lai hian NDA pawh Delhi-ah thukhawmin party 38 an kalkhawm.
Delhi-a thutkhawm hi sawiin Kharge chuan BJP chu an mangang niin a sawi a. “A hma chuan BJP hian an ngaihsak lem lo va, an sawi ngai lo. NDA hi an darh mek a, tunah chuan PM hian hui khawm a tum a. Hei hian eptute a hlau tih a lang,” tiin a sawi.
NDA thutkhawma telte chungchangah pawh, “Tute nge an nih hlawm ka hre lo. Registered party an nih chuan ka hre vek lo vang, India-ah hian party a tam lutuk a,” a ti.