Aizawl : ZPM party-a Zonu Gen. headquarters kaltlanga Manipur atanga Mizorama sahimna zawnga awm te tanpuiana tur mitlawmngaite thawh khawm chu nimin khan ZPM party Treasurer C. Laltanpuia’n Vanapa Hall kawt atangin a vailiam.
ZPM Treasurer chuan tun hnaia Zohnahthlakte chenna hmun hrang hranga harsatna thleng thin chu pawi a tih thu a sawi a. Hnam ropui apiangte hnama an chian thu leh Mizo te pawhin hnama chiana, hnam hlutna ngaipawimawha, Pathian ram leh a felna zawn a tul thu a sawi.
“Hun harsa kan tawh te hi, kan Zohnahthlakpui hmun danga awmte harsatna mai ni lovin Mizote harsatna a ni tih hriaa, kan zavaia kan tanruala kan intuamhlawm tawn a tul” C Laltanpuia chuan a ti a. “Heng hun harsa kan tawh te hi hnam inpumkhatna leh insuihkhawmna remchang atana kan hman thiam a tul” a ti bawk.
Manipur buaina avanga Mizoram beltu Zofate tanpuina tur hi Rs.12,965 bakah bungbel leh thawmhnaw engemawzat mi thahnemngai ten an thawkkhawm a ni.