Thawhlehnia ZO Reunification Organisation (ZORO) Executive Committee meeting nimina neihah Manipur Chief Minister N Biren Singh chu Mizoram chhung thil thleng chungchangah inrawlh lo turin an hriattir.
ZORO chuan North East Live-a Manipur CM-in Mizoram chhunga ruihhlo kal vel, Mizoram police-in an mansak chungchanga tawngkam a nei chu tul an tih loh thu sawiin, “Manipur CM hi Mizoram state chhung thil thleng chungchangah rawn inrawlh buai lo turin kan hriattir,” tiin, Manipur CM chu a inrawlh lohna turah a inrawlhah an ngaih thu an sawi.
Manipur CM-in a state huam chhungah human rights dan khawvel hmaah a bawhchhia a, sorkar leh police chakna hmanga Zofate a bei leh, Manipur governor-in Manipur tual chhung buaina thleng chu an state pawn, a bikin Burma ram atanga chhuak anga a sawi an dem tih an sawi a. Manipur tual chhung buaina hi anmahni Manipur state sorkar siam a ni tih hre nawn turin an ngen bawk.
May 6, 2023-a Mizo Zirlai Pawl (MZP) in thuchhuah a lo siam tawh, Manipur tual chhung buai avanga Mizoram chhunga Meitei awmte an sahimna tura pawn chhuak rih lo tura a lo hriattir tawh chu a thlawp tlat thu ZORO chuan sawiin, “Mizoram state chhunga Meitei awmte chu anmahni sahimna tur a nih zawk dawn avangin pawn chhuak lo turin a ngen a ni,” an ti.
ZORO chuan July 12, 2023-a Manipur tual chhung buaina avanga Zohnahthlak unaute tawrhpuina, thlavang hauhna leh nunna chânte sunna hun hman zawh taka pen chhuak zawng zawngte chungah thinlung takin lawmthu an sawi bawk.