PC-in an party mi te Congress party-a lut tura sawm tawh lo turin Meriam L Hrangchal an ngen

PC party, Southern Hqrs., Lunglei-in Congress party zawm thar Meriam L. Hrangchal-in Congress party tana a campaign-na ah PC party au hla hmangin PC party mi leh sa te chu Congress party-a lut turin a sawm thin niin an sawi a. Hei hi hriatthiam har an tih thu sawiin, an party mi leh sa te chu lo sawm fo lo turin an ngen.

PC party, Southern Hqrs., Lunglei chuan “Meriam L Hrangchal hian chuan PC party policy tihhlawhtlin duh tak tak ni se chuan Congress party-ah lut lovin PC party-ah a luh ngei kan ring” tiin, “Congress party-a awm chunga PC party policy tihlawhtlin a lo tum hi ropui kan tiin, tihlawhtling ngei se kan duh a, mahse, he policy duangtu ngei PC party bakin a tihhlawhtlin theih kan ring lo” an ti.

“Kum tam tak Congress party kaihhruaiin Zoramah sorkarna an lo chang tawh a, duh tak tak ni se tihhlawhtlinna hun ṭha nei tawhin kan ngai” PC party Southern Hqrs., Lunglei chuan an ti a. “Zoram dinhmun vawiin thlenga kan thlir chuan an tum tak tak lo tih a lang chiang hlein kan hria” an ti bawk.

“Meriam L. Hrangchal-in PC party mipui Zoram hmun hrang hranga awm te PC party policy tihhlawhtlinna tura Congress party zawm tura a sawm fo mai hi lemchan na mai a ni tih kan hriain, tun hnuah chuan PC party mi leh sa te chu hetiang zawng hian sawm tawh lo turin kan ngen takmeuh a ni” an ti a. “Congress party hian Zoram hi siamṭhat tumna tak tak nei ni se hun tha an ngah tawhin PC party te chuan kan hria a ni. Pi Meriam-i pawh Zoram siamṭhat duh vanga politics luhchilh a nih tak tak chuan party politics tuinu hi lo dût ve lo turin kan ngen” an ti bawk a ni.

Leave a Reply

error: Content is protected !!