Aizawl: ZPM Thalaiin nimin khan Tourism department hnuaiah Reiek Tourist Resort siamnaah thil dik lo awm nia hriain Lokyukta-ah complaint an theh lut.
Lokayukta-a complaint an theh luh zawhah thuchhuaha an tar lan danin, July 14, 2023 khan Reiek tlanga hnathawh hrang hrangte chu an en dik a, Reiek tlang tihchangtlunna atan hian ‘Component 1 of Development of Immediately Required Infrastructure for Tourist Development at Reiek Tlang’ tih sanction amount atan Rs. nuai 560 dah niin, hna hmutu hi DJ Consultancy Services, Peter Street, Sikulpuikawn a ni a, restricted tender hmangin hna hi pek a ni. Hei bakah hian departmental work leh PWD Project Division-I atanga hnathawh Rs. nuai 114.4 a awm bawk.
Kum 2020 atang khan DJ Consultancy Service hna hmuh hi thawh tan a ni a, December, 2021 (thla 18 chhung) hmaa thawh zawh tur ni mah se hun tiam chhunga an zawh theih loh an dil belh a, thla 13 chhung pek belhin January, 2023 a thawh zawh tura tih a ni a. He hna hi works components 12-ah then niin, sanction amount leh hnathawh hrang hrangte a inmil lo a ni.
ZPM Thalai chuan work components 12 zingah main gate siamna atan Rs. nuai 53.07 leh parking area siamna atana Rs nuai 148.70 lai an dah leh an hnathawhte chu thil awm lo lutuk leh sum siamna dik takah an ngaih thu an sawi a. Parking area pavement hi rod tel lova chhun a nih thu leh work component zinga Construction of Parking Approach Rs. nuai 18.94 leh Repair & Renovation of Amphitheater Rs. nuai 95.61 senna phei chu a awmna hmun an hmuh zawh loh thu an sawi.
Kum 2022 vek khan ‘Repair & Renovation of Reiek Tourist Lodge & Zokhua’ atan Rs. nuai 32.48 chu PWD Project Division-I atangin sorkarin a ruahman leh a, cottage pali siam thatna atan Rs. nuai 3.2 theuh, a vaiin cheng nuai 12.8 lai mai a ruahman leh te pawh a hmanna an hriat loh thu an sawi bawk.
Heng bakah hian Zokhua chei thatna atana cheng nuai 10 chuang dah ni si a, hnathawh mumal hmuh tur awm lote, Cafeteria atana cheng nuai 2.65 ruahman te, Rest Hut Roof siamna atana nuai hnih dawn senna te hi thil awm lo tak nia an hriat thu an sawi.
Reiek tlanga DJ Consultancy-te hian an hnathawh hi total estimate amount-ah Rs. nuai 560 a nih laiin RTI chhannaah pawisa hmanna hi Rs. nuaih 447.22 chauh niin, Rs. nuai 82.78 lai a hmanna tar lan a nih loh thu sawiin ZPM Thalai chuan, “Kan ram rohlu hmanga sum siam a ni hi Mizoram thalaite rilru a nain, thalaiten an ngai thiam lo hle a, he thil dik lo titu hi kan dem a, thil dik lo tituten hremna an tawh ngei kan duh a. He thil dik lo chungchangah hian a changtu Minister Robert Romawia Royte hi insawifiah ngei turin kan phut a ni,” an ti.