Typhoon Talim chuan China chhimchhak a nuai a, mi 2,30,000 zet an chenna atangin an chhuahsan phah a, Asia khawmualpui hian ruah tam tak leh khaw lum uchuak tak an tawng mek.
Thlawhna thlawk chhuak leh lut chawlh a ni a, sangha manna khua leh tuipui kam hmun len khawthawnna hmunte pawh khar a ni a; mahse, tunah chuan a chakna hlohvin Vietnam lam a pan leh mek.
Hetih lai hian Japan-ah chuan khaw lum lutuk avangin mi 60 vel an dam lo va, China ram hmun thenkhatah pawh khaw lum ber ni an tawng mawlh mawlh hlawm bawk.
South Korea-ah chuan ruah tam tak sur leh lei min kaihhnawih hrang hrangah mi 41 an thi tawh bawk.
Talim hian Guangdong province a nuai a, darkar khata 140 dawna chak thlipuiin Thawhtanni zan khan a nuai a, Thawhlehni khan Guangxi a nuai bawk.
Lirthei tlanlai chungah thing a tlu a, whale pawh vaukamah len chhuakin Guangdong-ah chuan ice cream la khat tlat freezer chu khawlaiah a len darh nasa hle bawk.
Firefighter-ten thingin car-a delh avanga a chhunga tangte an chhanchhuak a, kawng hnawkte thian faiin lirthei khalhtute pawhin an pui nasa hle tih sorkar chanchinbu chuan a sawi.
Tual chhung thuneitute chuan sangha manna lawng 2,700 vel tuipui atangin an ko haw a, sangha mantu mi 8,200 chuang zet chu vaukam atangin hmun him dangah an suan bawk niin Xinhua chuan a sawi.
Typhoon a thawh hma ni hnih maiah khan hmarthlang lam province, Xinjiang-ah chuan khua a lum hle thung a, China-a chhinchhiah china a lum ber tum, 52.2°C a tling a ni.
Japan-ah chuan Tokyo Disneyland leh DisneySea-a pawn lama thil hmuhnawm entir chi ang chu khaw lum lutuk avangin Thawhtanni khan an chawlh phah.
Japanese thuneitute hian prefecture 47 an neih zinga 32 huam chhungah zet khaw lum tur laka inralrinna an tichhuak a, 40°C lai a kai thei dawn niin an sawi lawk.
South Korea-ah chuan an ram lailia tlangram, Cheongju-a tui lianin a chim lei verh atanga ruang an lak chhuah hnuhnung ber an la chhuak.
South Korean President Yoon Suk Yeol chuan an ramin khaw awm dan uchuak tak an tawrh chu an theih ang tawka thain an hmachhawn tih a sawi a, hetih rual hian hetiang thil hi thil pangngai a la ni thuai thei niin a sawi.
Hetih lai hian khaw lum uchuak tak hian Thawhtanni zan khan US leh Europe a tuam bawk a, karleh thleng hian a lum la rin a ni.