National Highway 302, Lunglei to Tlabung kawngpui siam that thuai phutin Tlabung khaw chhuak te chu nimin khan NHIDCL office tual, Tuikhuahtlangah an pungkhawm a, NHIDCL office chhunga kawng chhe thlalak an tar.
Tlabung village council leh Tlabung Welfare Committee, Aizawl huaihawta punkhawmnaa thusawitute chuan National Highway 302 sial that leh laih zauh hna, package A leh package B chu kum 2021 June leh July thlaah tran ni mah se kum 2 a ral tawh hnu-ah pawh hnathawh tur za zela 17 bak zawh a la ni lo tih an sawi.
Kawng siam hna hi a muang mai ni loin, laih tawh chin pawh khawl hmanga nawr mam emaw lung phah a nih loh avangin ruah a sur hlek chuan a diakin a nal em em a, nitin lirthei veivak an tan bakah chetsual phah tam tak awmin nunna chan phah hial pawh an awm tawh tih sawiin,”Kawng sial mek hi ngaihsak leh ngaihpawimawh chu ni se tun ang em em hian zawh a hrehawm lo ang,” an ti.
Tlabung VC leh Tlabung Welfare chuan kawng sial tu SRK Construction and Infrastructure pvt. ltd chu hna thawk zui tlakah an ngai lo a, a rang thei ang bera contractor rintlak leh hnathawk tha thei ngei tur hnena hna pe thuai turin NHIDCL an phut a, inkalpawhna kawngpui tha chu hun rei tak chhung an lo nghah leh thlir, damkhawchhuahna tura an mamawh hmasa a nih avangin kawngpui tha an neih theih nan theihtawp an chhuah zel dawn tih an sawi a ni.
Kawngpui siam that thuai phuta pungkhawm te hian kawng tha an duh thu in ziahna placcard kengin, kawngpui chhe lutuk thlalak te an keng bawk a, thusawitute’n thu an sawi zawh hnuah NHIDCL office chhungah lutin, General manager leh thawktu dangte hnenah an lungawilohna hrang hrang an thlen a, Tlangbung khaw mite hi an thawm ringin boruak lum viau mah se buaina erawh a chhuak lo a ; Office chhungah leh office chhung hmun dangah te kawng chhe thlalak an ken chu an tar bawk a ni.