Bundesliga champion Bayern Munich in pre-season inbuatsaihna inkhel an hmachhawn hmasak berah goal an khung hnem hle a. FC Rottach-Egern chu 27-0 in an hneh.
Bayern khingpuite hi German football a division 9-na a khelte an ni a. An lakah Bayern player pali in hattrick an siam a. Jamal Musiala, Marcel Sabitzer leh kum 18 mi Mathys Tel ten goal nga theuh khungin Serge Gnabry chuan goal thum a khung.
Defender lakluh thar Raphael Guerreiro chuan goal hnih khungin Bayern kawr ha chunga a inkhel hmasak ber a ni a. Chhuak mai tura sawi Sadio Mane leh Kingsley Coman ten huntawp hma in goal khat ve ve an la khung ve leh bawk.
Bayern Munich hian kum 2019 khan Rottach-Egern hi lo hmachhawn tawhin 23-0 in an lo hneh tawh.
Austria ramri bula training camp nei mek Bayern hian tun pre-season inbuatsaihnaah Manchester City leh Liverpool te an la hmachhawn ang.
Thawhlehni a an inkhelhnaah hian an defender lakluh thar Kim Min-Jae chu a entu zingah a tel a. South Korea International hi Euro maktaduai 50 in an lalut a, an hnenah kum nga contract a ziak.
Bayern CEO Jan-Christian Dreesen chuan, “A pumrua a lian a, thahrui a ngah. A rilru a huaisen bakah a che rang a, kan pre-season inbuatsaihnaah a tel nghal thei tur hi kan lawm hle.” tiin an player thar chungchang a sawi.