Aizawl: Mualkhang Bottling Plant sak len leh sak that tur chungchangah nimin khan Supply Minister K Lalrinliana leh Indian Oil Corporation (IOCL) hotute an inkawm.
Inkawmhonaah hian IOCL hotute chuan Mualkhang Bottling Plant sak len leh sak that tumna chu tan theih vat a nih dawn thu Supply minister chu hrilhin, lungphum phum dan tur leh a hunte pawh an sawi ho a, hemi chungchangah hian chief minister sawipui leh an tum a ni.
He huna an tarlan danin, Mualkhang Bottling Plant hi 2006-a lo hawn tawh niin, Oil Industry Safety Directorate in safety norms an siam te a phak tawh loh avangin 2020 tir khan khar a ni a. A siam that leh tih len na turin Mizoram sawrkar chuan kum 2021 khan ram hectare 2-a zau leiin a lo pe tawh a. Tun a gas bottling plant siam thar tur hi 30 TMTPA – 30000 Metric Tonnes Per Annum, kum khat a Metric Tone 30000 siam chhuak thei tur a duan a ni a, thla 24 chhung a siam zawh tur a ruahman a ni.
Tun lai hian Mizorama LPG mamawh zat hi nitin truck 20 vel phur a ni a, chu chu cylinder 6120 vel ani. Thlakhat ah cylinder 1,83,600 vel mamawh niin kum khatkhat ah cylinder 22,03,200 vel mamawh ang a chhut a ni.