ZPM Campaign Committee-in nimin khan thu thar thehdarhtute an kawm a, kumin MLA inthlanpui lo awm turah Congress leh MNF party pahnihte’n sum an hmachhuan ngei tura an ngaih thu an sawi a. Congress phei chu ZPM candidate tur Rs. nuai 100 tela thlemah an puh.
Aizawl Press Club-a an inkawmnaah ZPM Leader Lalduhoma chuan, MLA inthlanpui lo awm turah party pahnih, sum ngah tak an hmachhawn dawn a, mihring tak chuan an huphurh hle tih sawiin, “Congress unau te pawh an lo la hausa viau tih kan hria a, kan candidate tur pawh hi Rs nuai 100 telin an thlem a ni. MNF lam pawh 2018 inthlan khan Delhi atangin sum tam takin an pui tih kan hria a, tun tumah pawh hian Delhi sum an hmachhuan leh ngei turah kan ngai,” a ti.
Lalduhoma chuan kumin MLA inthlanpui lo awm turah an party official candidate turte chu an tihfel tawh thu a sawi a. Campaign khuhhawnna pawh neih thuai an tum thu sawiin, “Mihring lam inbuatsaihnaah kan inpeih tawh a. Tun atangin top gear in kan tlan thei tawh dawn a ni,” a ti.
Tun hnaiah Mizoram politics-ah thil thar a thleng a, chu thil thar chu sum leh pa thil tihtheihna hian hna a thawk ta lo a ni tiin Lalduhoma chuan, “Serchhip bial bye-election-ah te, Lunglei Municipal Council inthlanah leh Zemabawk Local Council inthlante rapthlak khawpin sum a leng a. Mahse, inthlan pathumah hian sum thil tihtheihna chu tihmualphoin a awm a ni,” tiin sum thil tihtheihna thi ta nia ngaih theih anih avangin lawmawm a tih thu a sawi.
ZPM leader chuan an party chu pachhe tak an ni a, inthlan pawh inhlawh chawpin an hmachhawn dawn niin a sawi a. ZPM candidate-te leh amah ngei pawhin ZPM Zonu te, ZPM thalaite hmun hrang hranga an block/unit te ni sen sa hnuaiah rim taka an inhlawhfakna leh party pawn lam atangin campaign na turte an dawng mawlh mawlh nia sawiin, “Chu chu kan chakna a ni a, hemi hmang hian inthlan kan hmachhawn dawn a ni,” a ti a. Sum thil tihtheihna timualpho turin Zoram mipuite khawngaihna a ngen nghal bawk.
Manipur tualchhung buaina chungchangah ZPM chuan dinna nghet an nei tih sawiin Lalduhoma chuan, “Manipur chu Meitei te ram bik a ni lo a. Tuna an buaina ngaihtuahin tribal te leh Meitei te chu rorelna neih hran tir hi kan thlawp a. Rorelna hrang han tih hian MLA leh an hruaitute nena kan inbia a, tunah an hrual mum tan dawn a, an duh apiang kan thlawp,” a ti.
ZPM Campaign Committee Chairman chuan Mizoram nena insuihfin an duh chuan Greater Mizoram aiin reunification chu ZPM duhdan a nih thu sawiin, “Hei hi an duh a nih chuan lawm takin kan pawm,” a ti a. Hetih rual hian, thuthlukna siam kawngah a nawrtu nih an tum loh thu leh ngaihdan siampui tura va inrawlh an tum loh thu bakah, an thutlukna engpawh an huam thu a sawi.
ZPM Working President K Sapdanga pawhin Uniform Civil Code chungchangah an party dinna chu Law Commission-in minority-te ngaihdan a khawnkhawm rualin, UCC an dodal tih ziakin an thlen tawh thu a sawi.
K Sapdanga chuan kum 2019 general election-ah BJP manifesto zingah langsar pathum – Citizenship (Amendment) Act (CAA) tih hlawhtlinte, UCC hman theih te, National Register of Citizens (NRC) kalpuite an tuam a, dodalna nasa takah pass thenkhat hi pass luih a ni tawh a, CAA chungchangah phei chuan Mizoram MP pawhin mittui tla chungin, a awmna party in ti tura an tih vangin a thlawp tih a sawi.
ZPM Campaign Committee Co-Chairman ni bawk K. Sapdanga chuan, India danpui hnuaiah India hi him ta lo nia an hriat thu a sawi a. UCC chu a bikin, Mizo Kristian-te bakah hmarchhak pawh a tuar nasa ber tur an nih thu a sawi a. India ram pumah hman ni suhse tih chu ZPM dinna a nih thu sawiin, “NDA thlawptu MNF sorkar hian bill an thlawp leh nulh ang tih hi a hlauhawm a. Chutih rualin, tun hnaia New Delhi-a NDA meeting-ah kan MP Pu Lalrosanga a tel a, awmzia nei turah kan ngai,” a ti.
The Zozam Times zawhna chhangin:
- Kumin MLA inthlanpui lo awm tura an party official candidate te chu an duh taka an thlan chhuah, a tha ber tura an dah a nih thu sawiin, “Kan party candidate-te hi an tha tawk a. Chutih rualin, kan candidate turte hi thihna te, accident avangte leh thil dangah loh theih loh thil thleng a awm a nih loh chuan kan ti danglam thei tawh lo,” a ti.
- ZPM Tresurer-in ticket chan ve loh chungchangah Lalduhoma chuan, “Party chhunga candidate chan leh chan loh chungchang chu nomination committee thutlukna a ni. Party ah mi tha tak tak an awm a, Office Bearer nih vanga candidate chan ngawt theih a ni lo. Party-ah mi tha tak tak an tam avangin bial 40 chu inchan ngaihna a awm tawh loh,” tiin, bial 40 chauh a awm avangin bial chang lo a awm theih thu leh bial 40 dang pawh la awm se tuna an candidate ang tluk tur an la neih thu a sawi bawk.
- Tuichawng bial candidate la puan loh chhan zawhna chhangin ZPM Leader Lalduhoma chuan, “Chakma area candidate kan dah dawn leh dawn loh kan la hre chiang thei lo,” a ti.
- Guwahati a zin tuma puhna chungchangah, “Hmaichhanah kan lo inbia a nih pawhin tunge a nih ka la hre lo. Tun tuma Guwahati-a ka zinnaah a lo tel ve a nih pawhin tunge a nih ka hre lo a. Hman deuh khan eng emaw thil statement siam chungchangah lawmthute a rawn sawiin kan inbe tawh a. Mi pakhatin Delson nena kan inbiakna vioce record pawh nei niawmin a insawi a. Khapa khan a nei a nih chuan rawn tichhuak turin ka cho a ni. Finfiah kan duh a ni,” a ti.