- Ruata
Hero MotoCorp chuan an bike lar leh hmingthang Xtreme 200S 4V chu a chi thar an tlangzarh leh ta a. Khawl thar chak zawk leh kentel thil thar tha tak tak nen an tichhuak leh ta a ni.
Hero Xtreme bike thar hi a hma aiin Rs. 5,890 velin a to belh a, Rs. 1,41,250 (ex-showroom, Delhi) man a ni dawn a. A elpui tur deuh bera market lama lang chu Bajaj Pulsar RS200 a ni a, a tlukpui leh a khawl milpui leh hnaih deuh bike dangte nen pawh a inel thei awm e.
Hero Xtreme 200S 4V-a thil thar chhinchhiahtlak deuh chu a khawl thar tur hi a ni a. He khawl thar tur hi 199.6cc, single-cylinder, air/oil-cooled engine niin Hero XPulse in a hman mek ang a ni a. He khawlah hian 4 valve technology kan hmu a, hei hian a power leh torque bakah a khawl pum performance hrim hrim hi a ti tha zual hle a, tlan chak laia vibration awm pawh a tlem bik em em a ni. He khawl a hman thar tur hian 19.1PS power chu 8000rpm-ah a pechhuak thei a, hei bakah hian 17.35Nm torque chu 6500rpm-ah a pechhuak thei bawk a ni. Heti a nih chuan a hmaa Xtreme 200S chhuak aiin zaa 6 velin a power a sang zawk a, zaa 5 velin a torque a sang zawk bawk a. A transmission lam pawh tuaithar niin gear ratio pawh thlak a ni a, hei hian a khawl theihna tha lehzualin a tichhuak thei dawn a ni.
He bike tlangzarh tharah hian a body graphics leh a rawng lamah pawh thil thar kan hmu a. A rawng duhthlan theih tur ho hi Matt Axis Grey Metallic, Panther Black Metallic, leh Moon Yellow te a ni a. A hma aiin a design hi a sports bike lehzual a, a clip-on handle bar pawh hi ti chhin hret a ni bawk a ni. Heng baka a body design leh nihphung hrang hrang chu a hmaa kan lo hmuh tawh ang a ni tlangpui thung a. He bike tharah hian twin LED headlamp kan hmuh bakah LED DRL leh taillamp te kan hmu bawk a ni.
Suspension lam pawh hi thil thar a awm dawn hran lo a. A hmaa kan hmuh ang a hmalamah telescopic fork leh a hnunglamah monoshock te kan hmu leh ang a. A brake lamah hian petal disc thar kan hmu dawn thung a, single channel ABS a awm bawk ang a. A kentel hrang hrang zingah hian full digital LCD cluster, turn-by-turn navigation leh smartphone connectivity tein thuam a ni a, hei hi tunlai thiamna hmanraw changkang, a lirthei khalhtuten an neih ve theih nana company lam hmalakna tha tak a ni.
Karizma thar chhuak dawn?
Hero MotoCorp atang hian Kazirma thar a chhuah leh dawn thu thuthang a awm leh ta a. Tunah hian Hero chuan design patent te pawh an file tawh a ni. He Karizma thar tur hi Karizma XMR tih hming puin a chhuah hmel a. Hetah hian khawl thar chak zawk bakah tunlai thiamna hmanraw thar hrang hrang kan hmu dawn a ni. A khawl pawh hi media thenkhat report danin 210cc khawl thar, 25bhp power leh 30Nm torque pechhuak thei tur khawl chak tha tak a ni dawn a. An tlangzarh har tawh lo turah beisei a ni a, chanchin kimchang chu Hero company lam hian an la tihchhuah thuai a beiseiawm a ni.