AIZAWL: Mizoram Youth Commission (MYC) Chairman Dr Vanlaltanpuia chuan nimin khan a pisaah MYC-in Super IAS 2023 programme hnuaia kum 2023 chhunga New Delhi-a MYC full Sponsorship hmu-a Foundation Course zir tura a thlan te result a puang.
MYC Chairman in kumin IAS 2023 programme hnuaia coaching kal tur a puan chhuah te hi mi 11 an ni, an vaiin mipa vek an ni.
Thu thar thehdarhtute a kawmnaah Dr Vanlaltanpuia sawi danin, MYC in kum 2021 leh 2022 khan Super IAS 20 leh Super IAS 40 a lo buatsaih a, chief minister pawhin budget speech-a a lo sawi tawh angin Mizo thalai, Delhi hmuna full sponsorship hmu a kal tur thlanna MYC Super IAS 2023 buatsaihah hian exam bei turin mi 365-in hming an pe lut a ni.
Exam hi Aizawl, Lunglei, Siaha, Champhai, Kolasib leh New Delhi-ah te buatsaih a ni a, July 10, 2023 khan Screening Test Exam hi neih niin, mi 188-in exam an hmachhawn a. Exam question paper hi VISION IAS ten buatsahin, exam result pawh an en nghal bawk.
Written Exam beitute atang hian a ti tha mi 40 te chu Personal Interview hmachhawn tur a koh an ni a, July 18 leh 19, 2023 khan MYC Conference Hall, MINECO-ah neih a ni. Interview board-ah hian Mizo zinga central service thawklai atangin Lalramsanga Sailo IRS, Rintei Renthlei IRS leh Elvina Leivon IA&AS te panel chair-ah hman an ni a, VISION IAS atanga mithiam rawn tirhte chu interview panel member-ah hman an ni bawk.
He’ng thlanchhuahte hi Zirtawpni hian Bond Agreement Sign pui an ni ang a, Super IAS 40 lo kalpui tawh dan angin, UPSC Prelims vawi hnih an hmachhawn hma chuan Central leh State hnuaia hna te an dil leh exam phalsak an ni dawn lo. A hma thei ang ber in Delhi-ah pan tir tum a ni bawk.