Eptu party an bengchhen vangin nimina parliament fur thutkhawm tan niah chawhma atangin rorel inkhawm tihtawp lailawk a ngai nghal.
Prime Minister Narendra Modi-a chuan a minister tharte inhmelhriattirna a hman zawhpui thei lo a, rorel inkhawm hi titawp lailawk rih niin chawhnu dar 2:00 an chhunzawm leh.
Modi hian eptu lamte chu zawhna khirhkhan tak tak nei turin a sawm a, sorkar laipui chhanna pawh tha taka ngaithla turin a ngen lawk.
Eptu lam an bengchhen vanga minister tharte inhmelhriattirna a neih chhunzawm theih tak loh hnuah Modi chuan, “Mi thenkhat chuan hmeichhia an tel vang te, OBC leh lo neitu fate an tel vangin an lawm chiah lo a, inhmelhriattirna hun pawh an hmang duh lo,” a ti.
Modi-a chuan rorelna in hmaa thuthar lakawmtuten an kawmnaah house-ah hian hripui chungchang chu a pawimawh dan indawta sawiho a duh thu a sawi a. Covid dona atana vaccine la tawhte chu ‘Baahubali’ tih hming a phuahsak a. “Vaccine hi ‘baahu’ bânah pek a ni a; chuvangin, vaccine la tawhte chu ‘Baahubali’ an ni,” a ti.
Pegasus malware hmanga minister, eptu hruaitu, chanchinbumi leh Supreme Court judge-te phone thlithlai a nih dan a darh chiam a, sorkar laipui chuan he thilah hian finfiahna tha tak leh thu dik tak phawrh tur a awm lo niin an puang.
Sorkar laipui hian parliament rorel tan dawn chiaha hetiang thu darh hi thil thleng palh ve mai a nih thu a sawi bawk.