India khawthlang lam, Gujarat-ah kawngpui sira zana riak, kut hnathawk mi 13-te chu nimin zing khawvar hma khan truck lianin a hnawl avangin an thi.
Thuneitute chuan mi dang pruk pawh na takin an hliam niin tual chhung chanchinchubumite hnenah an sawi.
Truck hi tractor nen an insu a, a khalhtu chuan thunun zo lo zuiin kawng sira riakte chu a hnawl ta vak a ni.
Prime Minister Narendra Modi chuan chhiatna thlenga nunna chân an awm pawi a tih thu Twitter-ah a tar lang.
Thi leh hliam tuarte hi hmar lama Rajasthan state-a mite an ni a, chhuna an hna thawk zo, zana kawng sirah an riak a ni.
Thuneitute chuan thil thlen dan kimchang an chhui mek tih an sawi a, hliam tuarte pawh a bul lawka Surat damdawi inah dah luh an nih thu an sawi bawk.
India ramah hian an khawpui lianah chuan hetianga mahni state ni lova hna thawka kal, kawng sira riah mai hi thil thar a ni lem lo va, lirthei chesual avanga nunna chân an awm phah fo tawh thin.
Lirthei chesual chauh a ni lo va. Nikuma coronavirus a len tan tirha khauh taka ram pum a inkharkhip lai pawh khan Maharashtra-a mahni khaw lama haw tur relkawnga riakte chu bungraw phur relin chilin mi 16 zet an thi.
Heng mite hi an hna thawhna hmun atanga haw tuma rel station pan, an kalkawnga zan riak ta an ni.