Aizawl: MNF Media & Publicity dept-in nimina Aizawl Press Club-a thu thar thehdarhtute an kawmnaah a tawp thlengin Manipur-a Zohnahthlak unaute thlavang hauhin ke an pen dawn tih an sawi.
MNF Media & Publicity dept General Secretary VL Krosshnehzova chuan Manipura kan unau pawisawi lo Mizo hmeichhe pahnihte chunga rawng taka Meitei ho chetna hi MNF chuan paidam mai chiah a ngai lo tih sawiin, “Saruaka kawng zawh pui a, pawngsual rawn a, sawisa zuiin, an nunna hial an lak sak kha a rawng kan ti a. Tunlai khawvel hmasawn tawh karah hmanlai rilru, ramsa ang maia insawisaknaah a thleng hi a mak kan tiin a na kan ti,” tiin, a tawp thlengin Zohnahthlak unaute thlavang hauh nan an pen zel dawn thu a sawi.
Thil rapthlak tak kan farnuten an tuar hi MNF chuan a dem takzet tih sawiin VL Krosshnehzova chuan, “Mawhphurtu chhuichhuah leh hrem kawngah Manipur sorkar, N. Biren Singh-a kaihruai leh central sorkar chu chak taka hma la a, an tih tur ti nghal turin a ngenin a hriattir nghal a. An tih tur an ti thei lo a nih chuan kan farnute thisen min auhna chhang tur hian MNF chuan hmalak nghal a inpeih reng a ni,” a ti.
May 4, 2023-a thleng tawh vawiin thlenga hmalakna mumal a la awm lo hi Manipur sorkarin mi mal zalenna humhim tura a hlawhchhamzia leh hleih nei taka ro a rel zia a lang chiang hle tih sawiin, “Central sorkar chu a tih tur tia mihring zalenna hum tura che nghal turin na takin a kar nghal bawk,” a ti bawk.
“Kan farnu, tihduhdahna tinreng tuar a, a rapthlak thei ang bera sawisak tawkte thisen authawm chuan zalenna suala nunna chân huamtu martar-te thisenin a bual tawh MNF thinlung a ti rum a. An thlarau muang takin chawl hahdam se,” tiin, an vawiin nun naktuka Zofate tana an hlanna hi Zofate thinlungah a nung reng tawh dawn niin a sawi.