Chi leh chi inkara tharum thawhna thlenna hmun, India hmarchhaka Manipur-a hmeichhe pahnih, saruaka khawlaia mipuiin an kalpui lai video darh chungchangah Unau Tribal Women Forum (UTWF) Delhi & NCR chuan Ningani khan National Commission For Women (NCW) Chairperson Rekha Sharma-i hnenah pawikhawihtute chu dan anga na thei ang bera hrem tura ngenna an thehlut.
UTWF-in memorandum an thehluhah hian mi tute emaw, internet hmanga inhuatna thu, hla leh milem thehdarh chung leh hmeichhiate tihbawrhbanna lam ti thinte lakah a rang thei anga hremna lek an phut tih an tar lang.
Chairperson pawhin UTWF thil ngen chungchang chu a thlawp tlat thu a sawi a. Commission chuan Nilainia video darhah hian ke a lo pen tawh thu leh Manipur DGP pawh dik taka chhui tura an tih thu an sawi.
Twitter hnenah pawh vantlang media kalhmang (public media norms) bawhchhiaa khatiang video rapthlak lutuk tihchhuah an phal mai chungchangah show cause notice an pe tih a sawi.
NCW chuan social media-a hmeichhiate hmingchhiatna thlen thei ang thil tih chu a ngaizawm dawn lo tih a sawi.
Sharma-i chuan Manipur-a thil thlengte chu an bengkhawn a, eng ang chi pawha hmeichhiate beihna laka ven, beih letsak leh hum turin an theihtawp an chhuah zel dawn tih a sawi.
UTWF aiawhte pawhin chairperson hmalakna chu tha an tih thu leh an thlawp thu an hrilh a, commission pawh hmeichhiate dikna chanvo humhalhna tura ke a pennaah an thlawp zel dawn tih an sawi.