Chinese nupa tuak khat chuan kum 1988 daih tawha an fapa, hotel atanga miin an ruksak chu kum 32 zet hnuah an hmu chhuak leh nawlh mai.
Mao Yin-a hi kum 2 mi lek a nih laiin an nursery atanga a pain a hruai haw chu kawngpuia tui in tur a laksak lawk hlanin ruk bo a ni a, rei tak an zawng tawh.
A nu leh pa hian an ram pum an zawng tih theih a ni a, a nu phei chuan a fapa zawn nan lehkha vawi 100,000 chuang a thlawh chhuahtir hial.
He mite chhungkua hi Thawhtanni khan an intawng leh ta nawlh a. Tunah chuan an fapa pawh hi kum 34 zeta upa a lo ni tawh a, a hma hun thui tak sawi thei lo mah se a nu leh pate kianga hun la hman rih a tum thu a sawi.
“Kan intawn leh theihna tura thawktu zawng zawngte chungah lawm thu ka sawi,” tiin a nu, Li Jingzhi chuan a sawi.
Mao Yin-a hi February 23, 1986-a piang a ni a. An fapa an hmuh leh hma, January thlaa South China Morning Post-in a nu an kawmnaah chuan naupang fing leh duhawm tak, hrisel tak niin a sawi.
October 17, 1988 khan a pa, Mao Zhenjing chuan an Shaanzi province-a an awmna, Xian khawpuiah nursery atanga a hruai haw laiin a bo ta a. An haw kawngah hian a fapa hian a tui a hal thu a sawi a, a pa chuan hotel pakhat kawta tui a dawhsak hlanin ruk bo a ni.
An chhungkua hian Xian leh khawpui dang dangah pawh zawngin poster an tar a. Chhanna hmu thin mah se finfiahin a lo ni lo zel thung.
Li-i chuan a hna bansanin a fapa zawn beihpui a thlak ta a, province 10 chuang leh khawpui lian tak takah lehkha thawn chhuakin a zawng a, a hlawhtling chuang lo.
Chinese television show hrang hrang, The X Factor thlengin tanpuina dilin a inlan a. Chhui zui tur pawh 300 lai a hmu a; mahse, a hlawhtling thei lo.
Kum 2007 khan Li hian tlawmngaia naupang bote zawngtu, ‘Baby Come Back Home’ pawl zawmin mi dang puih pahin a fapa a zawng zui ta a.
He pawl kaltlang hian naupang bo 29 lai chu an chhungte nen a inhmuhtir phah a, a fapa ber erawh a hmu thei mai chuang lo.
April thla khan police-ten China chhimthlang lam, Sichuan Province, Xian atanga km 1000 chuanga hlaa mi pakhat, a hma daiha naupang la (adopt) hmuin a naupang a lak hi kum 34-a upa a ni tawh a. DNA endiksakin Mao Zhenjing leh Li Jingzhi fa ngei a ni tih an finfiah thei ta a ni.
Mao Yin hi tuna a hming chu Gu Ningning a ni tawh a, in cheina lama sumdawng a ni tawh.