NGO Coordination Committee chuan Manipur-a Zohnahthlakte tawrhna hriatpuina leh tawrhpui nan July ni 25 khian Mizoram pumah Zo hnahthlak unaute thlavang hauhna kawng zawh huaihawt an tum.

Nimina NGO Coordination Committee hruaitute Central YMA Committee room-a thukhawm chuan Manipur-a Zo hnahthlakte harsatna tawh mek chungchang an sawiho a, July ni 25 Chawhma dar 11:00 hian Mizoram pumah “Zo hnahthlak unaute thlavang hauhna” kawngzawh huaihawt nise tiin a rel.

Kawng zawh naah hian sorkar hnathawk, zirlai, Sumdawngte leh Lirtheia eizawngtute pawh kawngzawhnaah hian an hna tulte kalsan a tel theuh turin an ngen a, hemi ni hian mipuite chu Mizoram chhunga In tinah Puan dum zar theuh turin an ngen bawk.

NGO Coordination Committee chuan Mizoram chhunga Meitei awm mekte an sahimna atan fimkhur turin a ngen bawk a ni.

MZP-in ‘Peaceful Demonstration’ huaihawt dawn

AIZAWL: Mizo Zirlai Pawl (MZP) General Headquarters, Aizawl, Executive Committee meeting chuan AR Lammualah ‘Peaceful Demonstration’ huaihawt an rel.

Ningani-a MZP Conference Hall-a MZP President Lalnunmawia Pautu kaihhruai thutkhawmah hian, Manipur buaina avanga Zofate tawrhna an sawi ho hnuah, an thlavang hauh nan August 3, 2023 khian AR Lammualah ‘Peaceful Demonstration’ huaihawt an rel.

Thutkhawmah hian Manipur tualchhung buaina chungchanga Zofate thlavang hauhtu mi eng emaw zatte dikna leh zalenna rah beh sak a, thubuai rip tak Manipur CM Biren Singh-a’n a siamsak chu an dem tih an sawi a. An thubuai tihtawp a nih theih nan tanpui an rel bawk.

MZP chuan May 4-a thil thleng, tun hnaia social media-a video darh, Meitei-ten Zohnahthlak hmeichhe pawisawi lo pahnih pawngsual a an zahawmna tihbawrhbanga saruaka kawng an zawhpui chu a runthlak an tih thu leh, hetiang thil duhawm lo hi thleng nawn tawh lo tura an duh thu an sawi.