• Hruaia Pa

Mizorama khelmual ngaihhlut hlawh ber Sipai Lammualah September 23, 2010 zing dar 8:00 atangin Phul lem phah tan a ni a. Phul lem phah hi zawh fel a nih hnuin February 28, 2011 – Thawhtanni ah hawn niin, ‘khel mual tha, khelmual tha’ tia au thangkhawk rawih rawih chuan Lammual a chhuahsan fel ve ta. ‘Kan tih luatah lengi kan va zir sual e’ tih ang deuhin phul lem phah chu kan uar chho ta viau a. 2023 a nih meuh chuan Phul lem phah chu football hmasawn nana pawimawh ber maw kan ti ta hial niin a ngaih theih ta hial.

Brazil i thlir ang

Brazil hi football thiam ram, World Cup a champion ngun ber an ni. Football thiam ram an nih vangin an ram mi tawh phawt chu football thiam tura ngaih an ni deuh chawt.

Brazil hi ruahtui tamna ram a ni a, hnim a than duh em vangin khelmual enkawl chu thil hautak a tling. Khelmual enkawl a hautak em vangin football stadium tha an ngah lo teh tlat. Khelmual an ngah loh vangin khawlaia inkhelh an uar hle. Hmun rualrem lo tak taka inkhel ngun tak an nih vangin eng ti zawng pawhin ball sawt se an mahni an insiam rem zung zung thei thin. Ball thunun tura an insiam rem zung zung theih vangin thiamna ril an pianpui. Academy ah mumal leh awmze nei zawka zirin, an thiamna tihpun a ni. Khawlaia football khel thin, chher hriama awm tawhte chu khelmual thaah nuam ti leh ngampa takin an inlan a, hmuhnawm takin an thiamna an lantir zui ta thin a ni.

Champhai District ah khian khaw pakhat Selam a awm a. Selam chuan khelmual an nei tha lova, an khelmual neih chhun a zau lo hle. Khelmual zau nei lo mah se ball thiam khua an ni tlat thung a. Khelmual nei tha zawkte pawhin an tluk lo fo. Khelmual zimah chep taka inkhel thin an nih vangin ball inpek an thiam a, an passing a mawi em em thin. Chep tak karah pawh rang leh fuh takin ball an inpekual zung zung thei mai zel a, an game a mawiin hneh an har thin hle. Selam hi Mizoram Brazil tiin sawi ta ila, thu kan uar a ni kher lo ang.

Hei hi Mizoram

Rajiv Gandhi stadium kan sa a, AFC Cup tak ngial pawh thleng thei tura kan thuam changkan theih loh laiin thutna lam kan duhthawh viau thung. Nisa leh ruahsurin an la tihchhiat thuai tur plastic chair kan dah teuh a. |hutna tura kan daha thu tur an awm leh mang hauh si lo. RG Stadium a inkhel en kan pungkhawm tam ve fe nia kan hriat tum pawhin chhak lama thutna kan mawi tawk vel chauh a. Chuti chunga thu tur awm mang si lova thutna kan hah dah belh teuh maite hi a mak ang reng. Vai ram cricket stadium ropui leh zau tak tak kan hmu a, Cricket entu mipui an thu khat hmuk thinte hi kan mit thlain a hmu thin a nih a rinawm a. A nih loh pawhin Old Trafford a mipui khat hmuk thin te, Nou Camp a mipui nuai khat dawn an pungkhawm thin angte hi kan mitthla a ni maithei bawk. Anni anga inelna lian leh changkang thleng turin kan tling ve chuang hauh si lo tih lam chu kan theihnghilh leh si a nih a rinawm. |hu tur awm lo thutna leh chuang tur awm lo motor changkang te hi ropuina lem, tul lova sum luan ralna a ni daih thei.

Aizawl FC in AFC Cup an khelh tum khan an home Ground-ah Indira Gandhi Athletic Stadium, Guwahati an hman a ngai. Guwahati khelmual daih an hawh a ngaih nachhan hi AFC Cup thlenna tlak Mizoramin khelmual a neih loh vang a ni. State khat ve rengruang, football atchilh ram ni bawk tan World Class Standard khelmuala pakhat chauh tal neih loh hi thil inhmeh lo a tling.

Ram changkang zawkah chuan hun pawimawh bika inkhel lian tam thlenna tur khelmual ropui an sa a. Chung khelmual ropui leh changkangte chu an roh em em thin a, inkhel lian tham bik thlen nan chauh an hmang thin. Training nan an hmang ve ngai lo a, kohhran thalai sport nan an hmang ve ngai hek lo. Training na khelmual hran an nei ngei ngei a, an khelmual tak leh an training na mual te chu inang thei ang berin an siam a, an phul san zawng pawh a inchen thlap a thin. Keini chu kan stadium ropui ber pawh training na a ni nghal a. Kohhran thalai leh pawl dangte sport na hmun a ni nghal bawk. UK naupang te chak em em thin chu Wembley Stadium a khelh a ni. Wembley Stadium a khelh an chak em em chhan chu Wembley Stadium-ah a nazawnga an khelh theih loh vang a ni. Kan sawi kual ta duah, khawvela inel lian leh changkang ber pawh thleng tura tling zo khelmual tha, roh bik tur tling kan mamawh tih maite hi kan sawi tum chu a ni.

Kan thei a, kan tlin a nih chuan hmun hrang hranga khelmual sak a, Phul lem phah zel a duhawm. Chutihlai chuan tha thawkhat neih kual dum ai chuan tha filawr pakhat lek pawh neih a thlakhlelhawm zawk theihna lai a awm. International match thleng tlak khelmual pakhat lek neih pawh a hlawkpui viau theih ang. Kan khelmualin zir se SAFF Championship ngawt pawh thleng ve ta ila, football boruak chu khitah a invawrh dawrh thei. Friendly match nei turin Manchester United lo kal ta se, football boruak chu a alhin a alh thei dawn a, thutna ruak reng reng a awm thei dawn hek lo. Chutiang thleng zo tur khelmual nei si lo, inelna lian thlen tur chuang si lo tan ruak ringawt tura thutna duham viau te hian awmzia a nei thui lo. Ngaih pawimawh hmasak tur hlamchhiahin, a dawt leh a mi tur kan ti hmasa hlauh thin thung. Mipui an leng ngang lo a nih chuan miin khelmual an zauh mai thin a ni ngai e.

Phul lem phah kan uar viau te a thatna chen a awm ang a, vote zawn nan pawh a tha thei a. Sum leh pai zawng pawhin a hlawkna lai a awm mai thei bawk. Phul lem phah hi football hmasawnna tur a nih a, skills tha zawk kan neih theihna tur a nih chuan phah zel pawh a tha ang. Khawtinah phah thei nghe nghe ila a tha leh zual ang. Kan uar em em phullem hian academy pawimawhna a khu bo daih si ang tih erawh a hlauhawm ve thei thung. A pakhata kan insawrbing luatah pakhat dang kan manghilh palh a hlauhawm ve thei.

Zing leh tlaiah naupang atanga puitling thlengin an duh hun huna an inkhelh theihna khelmual hi an tan a hlu a. Chu chu khelmual tikhelmual leh zualtu pawh a ni ang. Phul lem kan phah hian football ngainatute an zalen ta sawt a, khelh theihna hun remchang an ngah ta sawt nge, khuahkhirhna hnuaiah awmin, an chep ta sawt tih pawh zawhna awm thei tak a ni bawk ang.

Phul lem nge Academy?

Football a hmasawn turin khelmual nge pawimawh academy tha tih hi zawhna chhan har tak a ni ang. Khelmual tha nei ila, Academy tha nei bawk ila, a pahnihin nei kawp tha ila a tha ber ang. Kan nei kawp thei lo a nih chuan academy tha kan mamawh hmasa zawk ang.

Football ram ropui te ngaih pawimawh hmasak chu football zirna tha a ni. Football zirna tha tak an din a, zirna hmanrua tha ber ber nen, a nih dan tur ang takin zir tur dik an zir thin. A bu ang thlapa zir tur dik zirchhuak an nih vangin footballer tha takah an inchherchhuak a, khawvel huapa tha ber berah an inchhuah thin. Thiam taka zirchhuakte tan khelmual ropui ber bera khelhna hun a lo inhawng zui ve leh mai thin. Khelmual ropuia khelh hmasak vanga inkhelh thiam ta ni lovin, an zir vanga thiamte chuan khelmual thaah an khel zui thin zawk tihna a nih chu.

Mizoram Sport & Youth Services Deparment in RTI Act hmanga zawhna min chhan danin Mizoramah Sorkar enkawl football academy pahnih; Saidan, Kolasib leh Lungleiah a awm. Football kan uar a, kan ngaihsan dan ngaihtuahin academy pahnih chauh neih chu a beitham hle. Grassroot kalpui an awm a, han zir silna tur chu a awm ve thluah mai thei bawk. Academy changtlung tak erawh kan la nei tlem hle. Heti lamah hian tan kan lak thar a ngai viau niin a lang. Khelmual pakhata Phul lem kan phahna ngawt pawh hian Academy changtlung tak a kalpui theih a rinawm.

Football a hmasawn leh zual turin academy tha kan din dawn nge. Phul lem phah zelin, Phul lem chuan Academy kan khuh bo tir zawk dawn?