Manchester United in pre-season inbuatsaihna atan a vawi hnih nan inkhel an hmachhawn a, French club Olympique Lyonnas nen inkhelin 1-0 in an chak.

Scotland a Murrayfield-ah Nilaini tlai khan club pahnihte an inkhel a. Second half-ah Manchester United midfielder Donny van de Beek chuan inhliam avanga hun rei khelmual a luh theih loh hnua a inkhel leh hmasak berah United chakna goal a ‘volley’ lut.

Mipui 48,484 hma a inkhelah hian rawlthar Daniel Gore-a’n ding lam atanga ball a cross chu Van de Beek hian boruaka a awm laiin a lo pet a, Lyon substitute keeper Remy Riou tan dan theih a ni lo.

United manager Erik ten Hag-a’n season thar inbuatsaihnaah naupang zawkte a enchhin bakah senior player thenkhat tan intahhriamna hun a hawng a. Tlarhmaah Jadon Sancho, Antony leh Amad Diallo te first half-ah che chhe lo mahse striker pangngai a mamawhna hmuh hmaih theih a ni lo.

United chakna goal khungtu Van de Beek chuan a hma hun a chiang lo tih sawi telin, “Inhliam damkawr ka ni a, ka fit tha a, training pawh ka nei rei ve leh tawh. Mahse hmalam pan a ka beih zel a ngai.”

“Ka hmalam hun hi a la hriat bik lo. Insawn thei ka ni ve thova, engmah chiang la awm lo.” tiin a sawi.

Pochettino pawlte

Mauricio Pochettino hnuaiah Chelsea a vawikhatna atan an inkhel a. Tunlaia an club neitute vanga hriat hlawh Wrexham chu 5-0 in an hneh.

United States a pre-season inbuatsaihna hmang mek Chelsea hian player naupang zawkte tan inkhelhna hun an siam hnem a. Malo Gusto, Andrey Santos, Diego Moreira leh Nicolas Jackson ten bul an tan vek.

First half-ah Netherlands Under-21 defender Ian Maatsen chuan veilam sira khelin danglamna a siam a, inkhel tan tir leh halftime dawnah goal a khung.

Pochettino chuan, “Tun hi hmasawnna hun a ni a, kan rilru puthmang leh kan inkhelhdan a lungawi thlak. Kan taksa kan inbuatsaihna hun a nih rualin kan inkhelh duhdan kan inzirna hun remchang a ni bawk a, hmalam kan pan zel a tul.” tiin a sawi.
Gunners an chak

Arsenal in pre-season inbuatsaihnan Major League Soccer All-Stars an hmachhawn a, 5-0 in an hneh.

Audi Field-ah mi 20,000 chuang inkhelah Gunners tan hian Gabriel Jesus, Leandro Trossard, Jorginho, Gabriel Martinelli te bakah Thawhlehni zana skill challenge-ah vawi 14 atanga vawikhatmah goal zawna ‘volley’ lut lo Kai Havertz ten goal an khung.

Manager Mikel Arteta chuan Havertz chungchang hi sawiin, “Kan team-ah theihna danglam deuh a lo keng tel. Ball thiamna a neih bakah a palian a, hei vang hian tlarhmaah kan mamawh hun a awm thei a, attacking midfielder ang pawhin kan tan a pawimawh thei bawk.” a ti.