Filmstar Rhea Chakraborty tan thawk huaina tham a tling. Nimin khan NCB chuan Bombay High Court-in bail a chhuahna chu an khinglet dawn lo niin, Supreme Court an hriattir.
Narcotics Drugs & Psychotropic Substances (NDPS) ACt hnuaia thubuai nei, bail-a chhuah zui ni bawk actress hi 2020 khan a bialpa leh filmstar lar ni bawk Sushant Singh Rajput thihnaa a kaikuang lianah ngaiin kawng tinrenga umzui niin, actor thihnaa ruihhlo kaihhnawihah Rhea hi man a ni a, a hu-ah baild-a chhuah a ni.
Bombay High Court chuan October 2021 khan bail-in a chhuah a, order tihchhuahah ruihhlo lei nana sum pek vang maiin Rhea hi ruihhlo kaihhnawih thilah a inrawlh ngei tihna a ni lo, tiin a tarlang a. Court vek hian ruihhlo tih nana sum pekchhuah vang maiin ruihhlo ti turin a nawr kal tihna a ni lo, tiin a tarlang zui bawk.
Nimin khan NCB hian Supreme Court-ah thu thehluin, Rhea laka bail tihchhuah chu an khinglet dawn lo, an ti a, hemi hnu hian Rhea chuan instagram kaltlangin, ‘Graditude(Sic)’ tiin caption a dah a, hands emoji in a khar.
Sushant Singh Rajput hi June 14, 2020 khan Mumbai-a a chenna In ah inawkhluma hmuh a ni a, a tir lama chhuinaah chuan actor lar tak hi ama thu-a intihluma sawi ni mah se, a chhungte chuan tihhlum ngei a nih thu an sawi..