Islam Makhachev-a khingpui ni leh tur a chiang ta a. Champion ni tura a hneh tawh Charles Oliveira nen bawk an intum dawn.

UFC lightweight champion hian October 22 a UFC 294 neih turah main event-ah a title hi a khingpui hlui lakah hian humhim a tum dawn. UFC president Dana White chuan Abu Dhabi-ah lightweight title rematch hi a thleng dawn tih a puang.

Chiang zawkin

Kum 31 mi Makhachev hian nikuma Oliveira hneh a champion a nih hnuah kumtir khan Alexander Volkanovski hnehin a title a humhim.

A khingpui ni leh tur inrinsiakna hi a tam a, UFC lightweight rankings a sang zualte zing ami tu emaw ber a nih mai fans ten an ring. Hetihlai hian Oliveira hi no.1 rank ni lai a ni a, Makhachev nen hian rematch an la nei lo bawk.

UFC 280-ah Makhachev hian round hnihnaah Oliveira hi submission hmangin a hneh a. A chak dan a chian avangin Russian champion in a khingpui ni leh tur a thlan theih phah.

UFC 284 khan featherweight champion Alexander Volkanovski nen inhmachhawnin unanimous decision in a chak a. 24-1 MMA record nei Makhachev hi a zawna vawi 12 chak lai a ni.

Mixed martial artist chhuah hnemna Dagestan a chawr chhuak Makhachev hi lightweight champion ni reng thin Khabib Nurmagomedov hnuaia inzir a ni.

34-9-1 MMA record nei a khingpui Oliveira hian rematch neih duh mahse title chuhnaah a hming a rik rin leh nan hnehna a chan phawt a ngai tih a inhria. Makhachev laka a tlawm hnuah thla hmasa khan round khatnaah technical knockout in no. 5 rank fighter Beneil Dariush a hneh.

Kum 2021 May khan Brazil a piang fighter hian Michael Chandler hnehin lightweight champion a ni a. May 2022 khan Justin Gaethje nen an inhmachhawn dawnin weight cut-ah a hlawhtling lova, a title hi hlihsak a ni.

Kum 33 mi Oliveira hi fighter hmuhnawm leh hlauhawm a ni a. UFC chanchin a a tawp thlen ngai lova chak hnem ber leh submission hmanga chak hnem ber ni kawp thei a ni.

Thenkhatin Volkanovski nen rematch an nei mai thei nia sawi a awmlaiin Oliveira zawkin huntha a nei leh dawn.