AIZAWL: Manipur-a Zohnathlakten nimin khan inawpna hran (separate administration) ngiatin Lamka-ah kawng an zawh.
Mipuite hian Lamka Public Ground atanga Peace Ground, Tuibong inkar KM 3 zet kawng an zawh a, kawng zawhnaa telte hi mi 30,000 vel zet an ni.
Kawngzawhtute hian ‘Tribal-te thisen a luang tam tawk ta, inawpna hran hi a chin felna awm chhun a ni’ tih te, ‘Rally for separate administration,’ ‘Central Govt, Please recognise our separation from Manipur’ tih leh a dangte inziahna thuziak an keng a ni.
Kawngzawh hi khaw tha tak hnuaiah chawhma dar 10 ah tan niin kawng lakah ruah nasa tak a sur a; mahse ruahsur avang hian kawngzawh an thulh chuang lo a, mipuite chuan inawpna hran an duh thu te, tribal inpumkhatna awm zel se an duh thute, Biren a sorkar bang tura phutna leh Arambaoi Tenggol an duh lohna te an auchhuahpui a ni.
Kawngzawh tawpna Peace Ground-ah ITLF hruaitute bakah tribal hruaitu dangten thu an sawi a, zai thiamte zaiin tribal martarte sunna neiin an chhungte hnenah pangparte an hlan a ni.
Rally zawh hian Lamka DC kaltlangin Union Home Minister Amit Shah hnenah memorandum an thehlut a ni.
Pherzawl Dist Parbungah pawh inawpna hran ngiata kawngzawh hi neih a ni bawk a, mi 2500 zet an pungkhawm a, Kuki-Hmar-Zomi martarte sunna neih a ni a, rorelna hran atan leh frontline a volunteer duty te tana tawngtaina hun neih a ni bawk.