BJP Mizoram President Vanlalhmuaka chuan nimina an party pisa, Mipui Run-a chhung inkhawmah AAP Mizoram chu Mizo hnam nun ze mawi tichhe lo tur leh tidal zawnga che lo turin a chah.
Zirtawpni khan AAP Mizoram mi leh sa thenkhatin Manipur-a tualchhung buaina thleng meka Zohnahthlakte thlavang hauha an punkhawm chungchangah Vanlalhmuaka chuan AAP Mizoram te chu vai tih dan tha lo hmanga mipui fuihpawrh chawp tumah puhin, “Mi office tualzawla buaina cho chhuak zawnga nawrh dan Mizorama seng lut lo turin kan chah a; Mizo Kristian takin AAP awm thiam turin kan chah bawk,” a ti.
Vanlalhmuaka chuan AAP inti emaw niten, Mizoin an tih ngai lem loh, Mizo mipui fuihpawrh tuma an party pisa kawta an vaipuite tihlawm tuma nawrhna an huaihawt chu Mizo nun ze mawi tihchhiat tumna leh tihdal tumna hmanrua a ni tih hi Mizoram mipuiten an hriat a tul tih sawiin, “Mizo Kristian chhul chhuak chuan hetiang thil kan hnam tana pawi thei hi kan hre tur a ni. Keini pawh kan hotute chu vai an ni. Ti tura min tih ang zawng zawng kan ti ve ngai lo. ‘Mizoin kan ti ve ngai lo’ tih chin hi kan nei a, AAP Mizoramte hian hetiang thilah chuan min rawn thin se tih hi kan chah duh a ni,” a ti bawk.
Prime Minister Narendra Modi-a’n tun hnaia Manipur-a Vaiphei hmeichhiate chunga thil thleng avang khan a thin a ur thu leh a rilru a nat takzet thu a sawi nia sawiin Vanlalhmuaka chuan, “Manipur-a thil thleng chu pawi a tih thu a sawi a ni,” a ti.
Mihring pangngai tu pawhin Manipur-a thil thleng an demin zahthlak an tih thu a sawi a. ‘State tin chief minister-te dan leh thupek kenkawh kawngah chak lehzual a kengkawh turin ka chah che u a, a bik takin hmeichhiate tan phei chuan venhimna a tha lehzual tur a ni’ tiin Modi-a’n thu a sawi tawh tih a sawi bawk.