Russian thil chhuitu (investigator)-ten police ei ruk hmang pawl an man chhuahte an umzui zelnaa mansion pakhat an luhchhuahnaah rangkachaka luan inthiarna (gold toilet) leh nawmsakna thil chi hrang hrang an hai chhuak.
Investigative Committee (SK) website chuan an thil hai chhuak video hi pho langin a turu hle a. Khawvel thil man to chi hrang hrang hmuh tur a awm.
An ram chhim lam, Stavropol biala traffic police hotupa, Col Alexei Safonov leh mi dang paruk man an ni.
Traffic police-te hian sumdawngte hnenah phalna lem (fake permit) pein thamna an la thin nia puh an ni.
Permit nei lo chuan lirthei khalhtute hian in sakna hmanrua leh dan phal loh thil reng reng, police checkpoint-ah an kaltlangpui thei ngai lo.
An mi puhte hian an puhna chungchangah hian engmah sawi an la nei lo.
Russia-a North Caucasus biala police zawng zawng chu ei ruk do beihpui thlaknaah an inhnamhnawih a. SK chuan hmun 80 chuang an hai zingah traffic police office pawh a tel a, pawisa tam tak bakah car changkang tak takte pawh an man tih a tar lang.
United States-a FBI anga kalpui, SK chuan Safonov-a leh a thuihhruaite hian kum tam tak chhung thamna hi an lo la tawh a, rouble maktaduai 19 ($2,55,000) vel an lo la tawh niin an sawi.
Safonov-a hian thiam loh a chang a nih chuan kum 15 thleng a tang thei dawn a. A hmaa mi chiah, Alexander Arzhanukhin pawh man zingah a tel.
Kremlin United Russia party MP Alexander Khinshteyn chuan helai bala traffic police officer 35 chuang man an nih thu a sawi.
“Stavropol-ah hian mafia an awm a, engkimah hlawkna neih an tum a, number plate zawrh atanga cargo permit thlengin, balu thiarnaah thleng hlawkna neih an tum,” tiin Telegram messaging app-ah a tar lang.