Chelsea chuan AS Monaco atangin defender Axel Disasi chu Euro maktaduai 45 (£38.57m) in an lalut dawn.
Kum 25 mi France international Disasi hian Chelsea tlarhnungah centre-back dinglam a khel thei tur duhthlan tur a siam belh dawn a, Wesley Fofana inhliam avangin defender thar lakluh an thlang.
Fofana hi nikum October khan a khup hliam avangin a chawlh rei a ngai a, season tawp lamah inkhel leh thei mahse tun season thar inbuatsaihna an neihlaiin a khup a ti na leh a, zai a ngaih avangin a chawl rei dawn.
Ani bakah Benoit Badiashile pawh a inhliam mek a, Premier League season bul tan hunah a inkhelh theih nghal dawn loh avangin defender thar an melh.
Blues hian tun dinhmunah senior team-ah Thiago Silva, Trevoh Chalobad leh Levi Colwill te chiah centre-half an nei a, Colwill hi Premier League club thenkhatin lakluh tumin an ngaihven bawk.
Disasi hian kum 2020 August a Stade de Reims atanga Monaco a pan hnuah an tan vawi 118 a inkhel tawh a, France tan vawi li a inkhel tawh.
Tun nipuiah Chelsea in player an lakluh pathumna a ni dawn a, striker Nicolas Jackson leh Christopher Nkunku te an lo lalut tawh.
Hetihlai hian Blues hian Rennes midfielder Lesley Ugochukwu chu Pound maktaduai 23 a lalut turin engkim an ti fel teuh tawh hle a. Loan in Ligue 1 club Strasbourg hnenah an kal tir nghal ang.
Blues hian an midfield thuam that erawh an la tum a, Ecuadorian midfielder Moises Caicedo chu Brighton atang lakluh theih an la inbeisei.
Blues hian squad lian tak an neih avangin tun nipuiah senior player an chhuahtir hnem tawh hle.