Commonwealth Parliamentary Association India Region Zone III Annual Conference vawi 20-na, 28th July atanga 1st August thlenga neih tur, Shillong, Meghalaya-a neih mekah Mizoram Assembly Speaker Lalrinliana Sailo leh Deputy Speaker H. Biakzauva te an tel a. Meeting thupui pahnih, “Natural Disaster and Strategies for Management with Special Reference to North East India” leh Regional Connectivity to bring North East Region at par with Mainland India” te an sawiho.
Meetingah hian Mizoram Assembly Speaker Lalrinliana Sailo chuan India hmarchhak bial chu khuarel chhiatna hrang hrangin a nuai thin thu leh chhiatna laka inveng turin CPA India Region Zone III member te chu tanrual a ngai tih a sawi a. United Nations Sustainable Development goals signatory an nihna angin hmasawnna atana hna an thawhna kawngah tun hun atan mai ni lo, chhuan lo awm zel turte ngaihtuahna nei chunga hmalak a tul thu leh hei hian ramngaw humhalhna kawngah pawh awmzia a neih tur thu a sawi.
Manipur tualchhung buaina avanga mi tam takin Mizoram an pan thu pawh sawiin, Lalrinliana Sailo chuan Zofate harsatnaah Mizoram sorkar chu a tlanchhe dawn lo tih a sawi a. Ram chhunga buaina punlun zel leh mahni ram chhunga India khua leh tui te ngeiin an tawrhna chu hawisan lova, theihtawpa tanpui turin CPA Zone III member te chu a sawm bawk.
Deputy Speaker H. Biakzauva pawhin India hmarchhak bialin India ram hmun zau zawk tluka hma a sawn ve theih nan inkawlpawhna tha a pawimawh thu sawiin, chuta tana India sorkar hmalakna te a sawi a. Kaladan Multi Modal Transit Transport Project leh NH 54 zauh te chuan hmarchhak bialah hmasawnna tam tak a thlen thei dawn a ni, a ti a. Chutih rualin hmasawnna project te hian environment a tihchhiat theih dan ngaihtuah tel a pawimawh zia pawh a sawi a. Information & Communication Technology lama hmasawnna a pawimawh thu te, Union Budget-a 7 priorities zingah ‘Inclusive Development” leh “Reaching the last mile” te tarlan a nih angin policy leh hmalakna kawng tinrengah mitin huapzo leh hmun kilkhawr ber thleng phaka hmasawnna hna kalpui thin ni se a duhzawm zia a sawi bawk a ni.
Nakum CPA India Region Zone III Executive Committee Meeting 6th-8th February, 2023 a neih tur chu Mizoram in a thleng ve thung ang.