Pakistan hmarthlang lama Islamist party-in intawhkhawm an huaihawt chu thihchilh bomb tihpuah hmanga beih niin mi 45 vel an thi.
Jamiat Ulema-e-Islam-Fazl (JUI-F)-in Bajaur district-a inkhawm an huaihawt beihnaah hian mi 100 chuangin hliam an tuar bawk.
Eng pawl mahin an tihah an la chhal lo va, chhui zui mek a ni a. A chhan awm hriat a ni lo.
Thuneitute chuan thi hi an la pung thei tih an sawi a, hliam zinga thenkhat chu an na hle hlawm niin an sawi.
Thuneitute hian chhanchhuah hna thawh chu zawh fel a ni tawh a, hliam tuarte pawh damdawi inah dah fel an ni tawh hlawm niin a sawi.
Chhui hna thawh nghal a nih avangin a bul hnai chu tlawhpawh theih lohva khar rih a ni a. Khyber Pakhtunkhwa province police chief chuan thihchilha tihpuah ngei a nih thu a sawi a. Bomb disposal teams-te chuan puak thei kg 10 vel hman a nih thu an sawi bawk.
Khyber Pakhtunkhwa province, Bajaur district-a Pathiannia Khar khuaa JUI-F workers’ convention-ah hian mi za tel an pung khawm a, he khua hi Afghanistan nena an inrina bul lawka awm a ni.
Thlalaka a lan dan chuan puan in (canopy) hnuaiah mi eng emaw zat an awm khawm a, dawhsan bul lawkah a puak a ni.
Thil thleng hmutu pakhat chuan an puan in kaih a chim chhe vek a, a hnuaiah chhuak thei lovin tam tak an tang niin a sawi.
Tual chhung TV chuan ambulance hmanga hliam tuarte damdawi in panpui lai a lang a, police chuan hliam tuar na zual chu sipai helicopter hmangin an bul lawka Peshawar khawpuiah enkawl turin an phur tih an sawi bawk.
Thuneitute chuan district damdawi inah health emergency an puang niin an sawi bawk.
Hliam tuar an tam em avang hian thenkhat chu damdawi in bathlarah enkawl hun nghakin an awm hlawm bawk.
JUI-F hruaitu, Maulana Ziaullah pawh bomb puakah hian a thi niin tual chhung thuneituten an sawi.
JUI-F hi sakhaw behchhan party lian ber niin parliament-a tangrual sorkar siamtu zingah pawh an tel.
Pakistan Prime Minister Shehbaz Sharif chuan ‘mi firfiak chetna’ tia demin ‘Islam, Quran leh Pakistan hminga hetianga che’ chuan ‘hremna dik tak’ an hmuh tur thu an sawi.
“Mi firfiakte hi Pakistan hmelma an ni a, an awm lohna turin chet kan la ang,” tiin thu a chhuah.
Tun tum anga pun khawm hi JUI-F chuan anmahni thlawptute an hui khawmna ber niin kumin kum tawpa inthlang tur an nih tawh bawk avangin an campaign-na a ni.
Eng pawl mahin an tihah la chhal lo mah se Pakistan-a Islamic State group (IS) chuan kuminah Bajaur-ah hian beihna an thlen nual tawh a, JUI-F ngei pawh hi an lo bei tawh.
June khan Inayat Killi khuaah party hotu lian pakhat thahnaah an lo inhnamhnawih tawh.
IS chuan an branch pakhat, ‘Khorasan Province’ (ISKP) chu a titu-ah an chhal a, anni hi Afghanistan leh Pakistan hmarthlanga che nasa an ni a. ‘Pakistan Province’ branch intiin Pakistan-ah chet an thawh nual tawh bawk niin an insawi.
Pakistani Taliban (TTP) chuan he thil thleng an dem thu an sawi a, an inrawlh lo tih an sawi bawk.
Kum 2021-a Afghanistan-a Afghan Taliban-ten thuneihna an chan leh hnuah TTP leh hel pawl dangte hi Pakistan hmarthlangah an tam leh tan a. Nikum November-a inkah hai an puan a tawp hnuah TTP hi an che leh nual tawh a ni.