India-a Railway Protection Force (RPF) constable chu Mumbai khawpui bulah rela mi pali a kah hlum avangin man a ni.
Police chuan Chetan Kumar-a hian RPF hotu sang pakhat leh rela chuang mi pathum a kap hlum niin an sawi.
Hetianga a chet chhan hi an chhui mek thu leh passenger a kah hlumte hi tute nge tih hriat tuma an chhui mek thu an sawi.
RPF hi India-a rela chuangte leh an bungruate vengtu tur an ni.
Inkahna hi Thawhtanni zing dar 5:30 vela Rajasthan khawpui, Jaipur atanga Maharashtra-a Mumbai pan a ni.
Kumar-a hian RPF Assistant Sub-inspector Tikaram Meena-a a kap hmasa ber a, mi dang pathum hi a kap leh ta niin RPF thuchhuah chuan a tar lang.
An chuanna relin Mumbai a thlen hma, km 96 vel chauh awm tawh, Palghar khua a thlen hmaa thil thleng a ni a. Mi a kah hnuah hian Kumar-a hian rikrum a awma rel dintirna, in-house alarm chain chu a pawt nghal a, hei hi tlanchhiat a tum vang niin Western Railways thuchhuahah tar lan a ni a. Mumbai daiah man zui a ni ta a ni.
Western Railways hotu lian pakhat chuan silai a hmeh puah hma hian Kumar-a hi mi dang nena inhnial thinrimna engmah an nei lo niin thuthar lakhawmtute hnenah a sawi.
“Amah lamah eng emaw dik lo a awm a nih hmel zawk,” a ti.