India hmar lam, Haryana-a sakhaw thila intihbuainaah mosque hal niin Muslim puithiam thah a ni bawk.
Buaina hi Hindu nationalist pawlin thil an tih khawmna atanga intan a ni.
He thil thlengah hian ‘home guards’ pahnih an thi bawk nia hriat a ni a, anni hi buaina chhuak thelh tuma police puitute an ni tih police chuan an sawi.
Hliam tuar zingah police eng emaw zat an tel a, damdawi inah dah luh hlawm an ni.
Buaina chhuahna hmun, Nuh khuaah hian curfew puan nghal a ni.
Chief Minister ML Khattar chuan thil thleng chu ‘vanduaithlak’ a tih thu leh mipuite chu buaina siam zawnga che lo turin a ngen.
Buaina hi Thawhtanni chawhnua Bajrang Dal leh Vishwa Hindu Parishad ten thiltih khawm an huaihawt atanga intan a ni a. Nuh atanga video darhah chuan lungin an intawng a, car hal a ni a, dawrte pawh suasam a ni.
Thil tih khawmnaah hian mi 2,000 chuang an tel a, heng mite hi buaina a chhuah hian temple-ah an tang zui a; mahse, a hnuah police-in an la chhuak.
VHP thupuangtu chuan an inkhawm lai hi lehlam hian an bei niin a sawi a, ‘ruahmanna fel tak nei saa che’ an ni tih a sawi bawk.
State chuan Nuh-ah hian internet a tithi nghal a, ‘boruak a titang zual thei’ niin a sawi a, nunna atan leh bungrua atan hlauhawm a ni thei niin a sawi bawk.
Tharum thawhna hian darkar eng emawzat a awh a, an bul hnai hmun thenkhat Faridabad, Palwal leh khawpui, Delhi daia Gurugram (Gurgaon tih thin) te pawh a kang kai hman a ni.
Gurugram-ah hian mipui thinrimin mosque an hal a ni.
Sorkar hotu sang pakhat chuan mosque hi beih a nih laiin duty turin police dah a nih thu a sawi a. “Mahse, a rawn beitute khan min tam hneh em em mai a, rang takin an hal ta mai a ni,” tiin Gurugram Deputy Police Commissioner (East) Nitish Agarwal chuan a sawi.
Police chuan thil thleng kaihhnawiha video hrang hrangte an la khawm mek a. “|henkhat chu anmahni pawh hriat an ni a, man tawh an ni,” tiin Agarwal chuan a sawi.
Sorkar laipui pawhin Haryana sorkar ngenna angin venhim hna thawktu tur mi dang a tirh belh.
Eptu, Congress party hruaitu, Randeep Singh Surjewala chuan state-a rorel lai, BJP chu demin ‘dan leh thupen kenkawhnaa hlawhchhamah’ a puh.
Indian National Lok Dal party hruaitu, Abhay Singh Chautala pawhin state sorkar hian himna a derthawng tih hre sa reng chungin a veng chuang lo niin a sawi bawk.
“Ni hnih liam ta chhung khan Nuh-ah hian dan leh thupek kenkawhna tibuai thei a awm thei tih sawi a awm sa reng,” tiin Chautala hian Indian Express chanchinbu a hrilh.
Bajrang Dal-a member pakhat, Monu Manesar-a’n online-a video a dah chhuah pawh sawi langin, Nuh-a inkhawmah hian a tel dawn tih a sawi tih a sawi a ni.
Manesar-a hi bawng humhalh duhtu hriat hlawh tak a ni a, ranvulh thiar kualtute khap an nih theih dan tur video a dah chhuak nasa thin hle a. Tun hnai kum eng emaw ti kal ta atang khan bawng vulhtu, a tam zawk Muslim-te hi Hindu sakhuaa a hum duhtuten heng lai velah hian an tibuai fo thin a ni.
Chautala chuan, “He thiltih khawmnaah hian a tel dawn tih a puang reng a, chuti chung chuan engvangin nge mamawh tawk leh mi venghim thei tawk tur police dah a nih loh?” a ti.
Chief Minister Khattar chuan Thawhtanni zankhan buaina siam zawnga khawsa lo turin mipuite a ngen nghal a, buaina siam lakah ‘khauh takin thil kalpui a ni ang’ tih a sawi bawk.
Thawhlehni khan Gurugram district-a Sohna-ah chuan police thahnem tak dah luh an ni a, Sohna leh Nuh inkalpawhna kawngpuiah kilometre hnih dan zelah barricade an siam bawk.
Thawhlehni tuk thleng khan tawlailir leh dawr thenkhat, Muslim tate chu halna hnuhma leh la khu mekte pawh hmuh tur a la awm hlawm.
State home minister chuan boruak thunun tawh a nih thu a sawi a; mahse, sikul leh internet chu Faridabad, Palwal leh Gurugram-ah la tihtawp rih a nih thu a sawi.