Zo rimawi khawvela hriatlar leh hriathlawh tak ni bawk zaithiam Lalngengpuii Tochhawng, Bethlehem Vengthlang a cheng chu nimin tlai dar 3:50 khan Kal thalo vangin Greenwood Hospital-ah a boral.Vawiin dar 12-ah vui a ni ang.
Kum 51 mi boral thu hian mi tam tak a barakhaih a, zaimite zingah ngei pawh nat lawkna a neih awm hre lo an tam. Heti anga a kal ta thut hian mi tam tak hrilh a tihai hle a ni.
Ngengpuii hian nikum khan Anxiety vanga harsatna a tawh thu hi July 18, 2022 khan social media kaltangin heti ang hian a sawi, “Mi ta tur chauh hi a lo ni lova, kei pawh Anxiety disorder a vangin thlahnih dawn chu ka nuam lo ve a, Damdawi in ah te hial ka lut ve rup rup mai a, amaherawhchu Pathian khawngaihna a vangin tun ah chuan ka hna te pawh ka chhunzawm leh thei tawh e,” tiin.
Ni li liam ta khan Facebook-ah, “Kawrthar hi chu ka nei khat ve a lawm… Ka ha rei thei ngar ngar,” tih a post a, social media kaltanga a thu leh hla hnuhnung ber a ni ta.
Ngengpuii hian A nu Lalthianghlimi Khiangte leh a fanu Lalbeiseii a kalsan a ni.