Khawvelah hian hnam tam tak an lo dingchhuakin an lo ral tawh a. Hnam ral thei lo a awm lova. Hnam te hi an lo dinchhuahna bul ber chu tanrualna leh an hnam chu tundin an duh tlat vang a ni thin. Hnam te an lo ralna hi lungrual lohna vang a ni thin bawk. Chu lo lehah chuan hnam te hi hnamdang nena an chenho naah hnam lian zawk nena an khawsak ho hian a te zawk an ral thin bawk a ni.
Mizote pawh hian hnam anga dinchhuah kan tum mek a. Hnam anga dingchhuak tur hian tih tur hmabak kan la ngah hle.
A hmasa berin kan hnam thilah hian kan lungrual thiam a ngai em em a. Keimahni leh keimahni hi intai lo a, kan vela hnam awmte lakah rilru thuhmun kan put reng a ngai bawk. Political party hrang hrangah kan awm a. Community organisation hrang hrang kan nei bawk a. Heng pawl hrang hrang hian hnam thilah thuvawn leh tum inang kan neih a ngai. A pawimawh lai tak chu kan hnam dinchhuahna tura kan hmalakna a lungrualna hi a ni.
Kan ram (tuna Mizoram kan tih bik) chhungah ringawt pawh hian hnam tenau kan kawl nual mai. Heng enkawl danah pawh hian kal dan tur felfai kan neih a ngai a. Entirnan, Chakma chungchang bikah te hian engtinnge hma kan lak ang tih hi chian a ngai a. Tam tak chuan kan hnam ni lo, ram pawn atanga lo lut an ni a. Umchhuah vek kan duh a. Thenkhat thung chuan kan rama cheng hlen ve tura anmahni zat chian law law a, zawi zawi a chimral tum mai a tha an ti thung a. Chutiang bawk chuan Tuikuk enkawl chungchangah pawh ngaihdan a phir thin. Ngaihdan leh pawm danah hian mahni inti lian zawnga hma lak nge pawimawh a inti bing zawnga hmalak tih hi buk a ngai. Kan rama rei tak awm tawh Gorkhali hi an ral lek lek tawh a. Mizo tan hnawk tham an awm tawh meuh lo. Anmahni tawng pawh an thalaite zingah hian thiam lo an tam tawh a. Hnawk han tih tham an awm tawh lova. Mizo anga en mai hian an mizo dawn tih a chiang reng tawh. Hnawk tih tham an awm tawh lo.
Engpawh nise, mizo hnam a lo len zel nan leh a lo ropui chhoh nan hian kan chhehvela cheng hnam te hi kuahkhawm a, tih mizo tumna hian kan hnam a tilian ngei chuan a rinawm. Ngaihdan hi kan mithiamte hian mumal takin kal dan tur min zirtir sela., reilote ah mizo hnam chu a lo lian chho in a rinawm.