Delhi-a mosque puithiam, kum 47 mi chu pawngsualtua puh a nih vangin Thawhlehni khan man a ni a. Delhi court chuan ni 14 chhung jail-a dah lailawk turin ruahmanna a siam nghal.
“Pawikhawihna chungchangah hian hekna kan dawn hnuah FIR kan ziak lut a, pawngsualtua puh hi man nghal a ni. Chiang zawka chhui zuina neih nghal a ni a, dikna hai lan a nih thuai theihna turin chargesheet siam vat kan tum,” tiin police thuneituten an sawi.
Hmeichhe naupang kum 10 mi chu Pathianni zan dar 10:00 vela mosque-a tui chawi tura a kal chu puithiam hian lo tibuaiin a lo pawngsual nia sawi a ni a. An ina a haw veleh a nu leh pate hrilhin an police-te hnenah an zualko nghal a ni.
Police-te chuan hmeichhia hi damdawi inah an enfiahtir nghal niin an sawi.
April thla khan Rajasthan-a mosque chhung vekah hmeichhe naupang kum 14 mi chu Mosolman thu zirlai pakhatin a pawngsual a, Rajasthan police-te chuan pawikhawihtu, Zafru-a chu an man nghal.
April 1 khan Muslim thu zirlai hian hmeichhia hi mosque-ah hruai lutin a pawngsual a. A chhungten an rawn zawng tih thawm a hriat veleh tuichhunchhuahah paihin a tlanbo nghal a. A hnu lawkah police-ten Bharatpur-a Gaondi thingtlangah an man a ni.
Hmeichhe naupang hi tuichhunchhuah atang hian laj chhuah niin damdawi inah dah a ni.
Police-te chuan Zafru-a hi IPC section hrang hrang leh POCSO Act hnuaiah thubuai an siamsak.