• Dr. C. Lalrampana

A KAMKEUNA

Khawvel hring mite hi Pathian anpuia siam ni mah ila, Eden bawhchhiatna khan kawng tin rengah harsatna min siam a. Natna, lungngaihna leh thihna thlengin ãnchhia kan dawn phah ta a ni tih kan hria. Hnathawh ngai lova nitin Pathian nen nuam taka lengdun thei reng kha mamawh tlãkchham nei reng rengin duh khawp leh hnianghnãr taka awm lai reng nei thei lovin; mi hausa tawntawte pawhin duh khawp an nei chuang nahek lo. Chuvangin, khawvelah hian enge tam ber tiin inzawt ta ila, a chhannaah chuan “awm lo leh mamawh tlãkchham a tam ber” tih hi chhãnna dik chu a ni mai awm e. Feb 19, 2020-a K. Hminga hla phuah zaithiam Sangtei Khuptongin a sak “Awm lo ta la, Ka hlimna a chuai ang a; Awm lo ta la, Ka hringnun a nguai ang a; Thliarkâr vâkvai te’n Lawngmi an ngai angin,, Aw ka di Ka hringnun hian a ngai che” tia a sak han kan thil mamawhte hlutzia leh ngainatawmzia, thinlung a khawih theihzia a hril chhuak chiang hle mai. Chuvangin, kan mamawh zawng leh duh zawng awm lo thin hian thinlungah helhkam lian tak min siam sak thin a ni.

TU MAW AWM LO TA SE?

Mimal, chhungkua, khawtlang, sorkar thlengin mamawh leh tul pawimawh tam tak kan nei; mahse, chungte chu a inang vek lem lo. Chung kan mamawhte tel lo chuan hring nun hi a famkim thei mawlh lo. A bik takin zofa. zohnathlãk zawng zawngte leh khawvel pumpui pawhin a hmelhriat leh ngainat ém ém, hringnun tifamkimtu pawimawh tak pakhat “awm lo ta se” Zofate tana pawi ém ém tur chu YMA hi a ni. YMA hi awm lo ta se, zofa, zohnahthlakte hnamzia rãng humhima tawng hrang thliar chuang lo, sakhaw chihrang hrangte lo kuah khawmtu tumah an awm lovang. Mizo hnamzia humhima pãrchhiahturtu chu Mizo Thalai Insuihkhawm Pawl (Young Mizo Association) hi a ni. A van lãwmawmin a van hlu tehlul ém! Zohnahthlãkte insuihkhãwmna Pawl lian ber YMA hian thil tum pawimawh tak tak pathum- hunãwl hman that; Zofate hmasawnna ngaihtuah tih leh Kristian nundan tha ngaihsante a ni a, Heng bakah hian ‘thu sãwm pek’ tha tak a la nei zui lehnghal; a van hluin a van ropui tehlul ém! Zohnahthlakte chên hlek tawhna khawvvel hmun dang leh India ram state dang dangahte zãr/pêng (branch) ngialnghet tak tak a la nei zui a, heng a zãr hrang hrangte nen hian lungrual takin Zohnahthlãkte inpumkhatna tha ngaihtuahin hringnun kan chên tlang mek a ni hi!

Selna ãnka tam tak karah YMA hian zãm hauh lovin taima tak leh rinawm tak, nghet taka ding fan fanin mizo tlãwmngaihna chhawm nung zelin kum 88 zet a tling ve ta der mai! Mizoram buai lai khan vai sipai pakhat chu phairam lamah an sawn dawn a, an hotute hnenah sawn lo hram turin a dil a. A thiante’n a dil chhan an zawh chuan-”Mizoramah chuan tlãwmngai pawl lian tak, hnamdang leh sakhaw dang bia pawh tumah thlei hrang chuang lo, keini vaichhia mai mai pawh harsatna kan tawh changa duat tak leh hmangaih taka min dãwm kanga min tuamhlãwm thintu YMA a awm avangin Mizoram hi damchhunga awm nan ka duh a ni.” a ti hmiah mai. He sipai lumum chhãnna ãwka hi a van mawi tehlul em! Ka thinlung bengah hian a chãm reng thin.

YMA-in mirethei bakberh leh chhumchhia tam tak, mi eng, mi ngo, mi dum, mi buang, vai leh vai lo, hnamdang leh ram dang atanga lokal mikhual harsatna hrang hrang tãwk thinte thlenga a chhawmdãwl dan mawiziate hi a van hluin a van ropui tehlul em! India ram leh khawvêl ram dangah pawh hetiang taka tlãwmngai pawl lian inhlãwm khawm tha leh mahni inphata theihtawp chhuaha mi dangte tana inpumpeka tanpui thin hi khawvel hmun dangah pawh zawng zawng mah ila hmuh tur a vang hle ta ve ang. Hei vang tak hian khawvêl ram dang atangte pawhin Mizo ram leh hnam min hrechiangtu apiangin Mizo hnam hi min awtin kan zinga khawsak an chak ve phah ém ém thin a ni. Damlo kan intanpui dan te, mithi kan invui dan leh khawhar kan inlênpui dan te, khawtlãng kan inpawhtawn dan te, inngeih dial diala kan khawsakho dante mit ngeia an hmuh changte hian kan tih dante leh insãwngbãwl dante hi an it ve ngawih ngawih thin. Mithi vuinaa tel ve Australian sap pakhat pawhin kan insåwngbãwl dante a hmuhin a awt ngang a niang, video-in a thla a la a, “ka haw hunah kan ramah ka tihhmuh ve dawn a ni; in insãwngbãwl dan hi a thain a mawi ka ti emai in khawsakho dan hi khawiah mah ka la hmu ngai lo” tiin a sawi chhuak hial a ni.

Feb 1, 2021 atanga Myanmar sipai thuneihna leh tihluihna hmanga Myanmar Democracy Sorkar a paih thlak atang leh tun thlenga Bangladesh leh Manipur buai avanga kan unau zohnahthlãk ral tlante a lo chhawmdãwl dan leh enkawl kawnga a thawh hlãwkzia leh thawh ropuizia te, kohhran, khawtlãng leh sorkar roreltute kaiza tichak tura tanpuina a pekte leh finchhuah thinna ropuizia te, raltlãn mangang leh vãkvãi tam tak a chhawmdãwl dan zawng zawngte han hriat chian phei hi chuan lãwm avangin biangah mittui a luang zawih zawih thei. Chuvangin, YMA hi awm lo ta se zohnahthlakte hlimna a chuai ang a; awm lo ta se, kan hringnun a nguai ang a; thliarkâr vâkvaite’n Lawngmi an ngai angin, aw! YMA, zohnahthlakte hringnun hian a ngai takzet che a ni” tih ve mai loh chu hmabak reng a awm lo.

A TLÃNGKAWMNA

Mizo hnam timawitu leh zohnahthlãkte insuihkhawmna Pãwl lian bera tlãk tlum tum vanga rawn sawi mawia fak tlawr satliah mai ka ni lo. A tak taka a thawhna leh mizo hnam damna a nih vang chauh zawka sawi mai ka ni. YMA hi awm lo ta se, Mizo hnamzia rang leh tlãwmngaihna hlu takte hi hetiang tak hian kan chhawmnung thei lovang, awm lo ta se, Mizo hnam tlêm tê, mihring nuai 20 pawh la tling lo hi chim ralin kan awm tawh ang; awm lo ta se, Mizoram hi India rama ram (state) ralmuang ber leh state hlim ber kan ni thei lovang; awm lo ta se, hetiang taka Zofate zinga inpumkhatna tha leh tluantling hi kan nei thei hauh lovang. YMA kan neih avang hian heti tak hian India ram mai ni lo, khawvel pumpuiin mizo ram leh hnamte hi min hmêlhriat chauh zawk a ni. Amaherawhchu, heng zawng zawnga hnam anga min dinchhuahtirtu erawh chu kan biak. Pathian nung, engkim titheitu vang liau liau a ni tih i theihnghilh lovang u. Kan Pathiannung hi “awm lo ta se” se” Mizo ram leh hnam hi hetiang tak hian kan pãr chhuak thei lovang. Chuvangin, kan zohnahtlãk unaute a bikin Manipura cheng mekte meitei chalrãnghovin thah chimih vek pawh pawisa lova an beih meknate tudawla che thei lova siam theitu kan Pathian hnenah hian tihtakzeta tawngtãiin YMA leh Mizo hnam dinchhuah zel nan i dil fan fan zel ang u. Mizo hnam dam reng rawh se.