- ZR Lalthlanmawia
Tunhnaia YLA Chawnhu Branch thuchhuak, Sports Minister Pu Robert Romawia Roytein an khelmual a siamthat sak vanga lawm thu sawina ka chhiar lai chuan ngaihtuahnaah thu dang a rawn lut daih maia, miin lawm thu sawina an neih lai laia thu dang lo neih daih mai chu, a mi anloh thlak thin bik mang e aw ti rilru chungin, eng emaw chenah tunlai Manipur thil thlengin mizote min ben harh mek boruak nen pawh inzar zawmna a nei ve bawk awm asin, te ka ti rilru bawk a.
Keima lamah min nawrtuin pân hnai la tur ang hrimin min tur deuh ut ut bawk si a; a thupui tur lah chu, Chairman in inkhawm bânna hla tur a thlan lawk sa ang maia chiang hian hawrawppui hlang ngatin mitthlaah a rawn lang a. Fel lohna, tlin lohna te ngaihtuahna sual leh hmui bawlhhlawh pu mi nihna te a vanga inkiltawihna lian tak nei chungin, thinlunga khat liam chu kâin a sawi chhuak thin tih a nih kha maw, a inlârna boruak vur mai ka ti; Horisaw.
Israel -ah hian hnam sawm leh pahnih an awm tih kan hriaa, Mizoah hian hnam peng engzat chiah nge awm ka hre seng lo kei mi mawl hian. Chutih lai erawh chuan hnam peng hrang hrangte chi bil anga inla hrang tam ber hnam kan ni mai ang em? Mizoramah hian Kohhran hrang hrang lah a tam narawh e. A kohhran ang zawng phei chuan kan inkarah DAIDANNA bang chhah tak, Doctrine vanga thawk ho hleithei lo kan nihna pawh hi zep leh thup theih a ni lo, a taka changtute vek kan ni e.
Pawl hrang hrang pawh hi kan nei tam ngiang mai, mizote kan intodelhna awm chhun chu, PAWL (NGOs) hrang hrang neih tam lamah khawvela intodelh ber hnam kan ni hial awm e. Mizo zawng zawng min phuar khawmtu lian ber chu kohhran ni lovin, YMA hi a ni.
Mizoram chhunga cheng tam zawkte lungawi taka YMA-ah kan inchhunkhawn laiin, hmun then khatah mizo nihnaa lungawi lo ni awm taka, a hnam bil leh chi bil hminga, a hrang a hraia PAWL hrang din tlatte hi mizote in unauna leh kan inthlunkhawmna kara lei khi siamtu leh hnam anga kan din chhuahna turah pawh a ruka harsatna thlentu leh min daidangtu a ni tlat hi a pawi tak zet a ni.
Mizo kan nih chuan YMA-ah hian lungawi takin awm tlang ila, Lai, Mara, Kuki, Chin leh Thado etc, ten mahni chi bil hminga PAWL dang kan nei fur mai te hi thiat darh ila, mizo kan nih chuan YOUNG MIZO ASSOCIATION – ah hian lungrual takin awm ila, chi bil leh hnam bil hminga pawl hrang hranga inbâwk hran hi kan ram leh hnam tan engmah thil tha min hrin chhuah sak dawn lo tih hi a chiang reng.
Chuvangin, Zofa zawng zawngte hrui khat vuana zai khata kan luan za theihna tur kawnga min DAIDANG thintu, Chi bil leh Hnam bil hminga kan kalna hi kan thiah darh loh chuan, kan inkarah hian eng emaw a la awm zel ang tih hi nang leh kei hi a hre chiangtu kan ni e.