Education Minister Lalchhandama Ralte chuan a thlawna zirlaibu sem tur a hun taka an pek theih loh chhan chu an lo chhut lawk aia tam zirlai an awm vang te, zirlaibu chhu tura an thlan hmasakte an inhnuhdawh leh tak vang a nih thu a sawi.
Nimina Aizawl Press Club-a thuthar thehdarhtute a kawmnaah The Zozam Times zawhna chhangin education minister chuan Samagra Shiksha hnuaia a thlawna zirlaibu sem tur chhu tur chu tender chhuaha thlan a nih thu sawiin, nikum September thlaah daih a chhu tur chu state pawna mi an thlang a, hetihlai hian December tawp lam tawhah an inhnukdawk leh thut a, Mizorama mi tlachawp takin an thlang leh a, hei hian zirlaibu chhut a tihkhawtlai phah ta tih a sawi.
Chhantea chuan sorkar sikula zirlai lut thar pung zel hian a thlawna lehkhabu sem a nghawng tih sawiin, “Zirlaibu kan pek tur hi UDISE data mil zela pek a ni a, Aizawl district-ah pawh nikuma lehkhabu dawng tura kan report aiin 4,921 zetin an lo pung a, khangte avang khan a hun taka pek theih loh a awm,” a ti a; zirlaiten a thlawna zirlaibu an dawn theih nan sorkarin hma a la tih a sawi.
The Zozam Times-in NABARD sum puk hmanga sikul chei that hna tha lo awm chungchang a zawhna chu chhang bawkin education minister chuan, “He hnathawktu hi a tu pawh nise dik leh leh fel loa thawkte chu an bill pawh pek loh tur kan ti a, a hmunahte kalin officer leh engineer-ten an endik vek pawh a, dik tak leh tha taka mittlunga an siam hma chu bill pek an ni lo,” a ti a, tunah chuan hna pawh an zo fel tawh a, bill pawh pek fel theihin a awm tawh tih a sawi.
Education Minister Chhantea chuan Mizoram sorkar chu nationalist sorkar a ni a, hmun hrang hranga Zohnahthlakte ang khata entu a ni tih sawiin, Myanmar, Bangladesh leh Manipur atanga Mizorama raltlante pawh a tuamhlawm mai ni loin zirlai mi 9,190-te chu sorkar sikulah admit an nih thu a sawi a, raltlan zirlai HSLC board exam hmachhawn zingah za zela 90.32 an pass tihte a sawi.
Zirlaiten hnam thinlung an put nan leh Pathian rinna leh zahna an neih theih nan sikulah ‘Ro min relsak ang che’ tih hla chu sak thin tur tih a nih thu te, zirlaiten Mizo hnam nun an hriat nan te, an tet lai atanga Mizo hnam nihna zahpui lova an nunpui theih nan ‘Zonun’ tih chu class VI, VII leh VIII-ah zirlaibuah hman a nih thute leh hmalakna dangte a sawi a. Sorkar enkawl sikulah zirlai enrolment a sang chho zel a, kum 2021-22-ah zirlai 1,28,927 an awm a, kum hmasa aia a punna chu 9,794 lai a nih thu a sawi bawk a ni.