Dillian Whyte thlaktu tur a chiang tawh a, hmanhmawh taka an buaipui hnuah Inrinni hian Anthony Joshua leh Robert Helenius te an inhnek dawn.
London a O2 Arena-ah Joshua leh Whyte te hi tun kartawpah, boxing khawvel nghahhlelh tak inhnekah inhmachhawn tur an ni a. Nimahsela tun kartawp khan Whyte hian voluntary drug test a paltlang lova, hei vang hian a inlan thei lo.
Joshua hian khingpui nei lova a awm laiin inlantir ngei an duh a, hei vang hian a khingpui tur dap nghal niin Finnish boxer palian a hmachhawn dawn.
Helenius hian vawi 36 inhnekah vawi 32 hnehna a chang tawh a. Kar khat pawh inbuatsaihna hun nei tling lovin Joshua a hmachhawn dawn.
“Hei hi kan beisei lawk loh, ngaihtuahna a awm pha miah lo a ni a. Hetiang hi ni tur a ni lo. Amaherawchu a thleng miau a, chak tumin ka rilru zawng zawng ka insawrbing a, a bak engmah ka ngaihtuah lo.” tiin a sawi.
Kum 39 mi Helenius hian nikum October a Deontay Wilder laka a tlawm hnuah boxing ring a la lut leh lo.
“Viking thisen dik tak ka taksaah a luang a, hei vang hian a tul phawt chuan tupawh hmachhawn nghal hi ka inpeih reng.”
“He huntha hi liamtir mai mai ka tum lova, ka tana remchang rawn awm hi a tha thei ang ber a hman ka tum.” tiin an inhnek tur chu a sawi ve bawk.