Congress hruaitu, Rahul Gandhi-a chuan a bial, Kerala-a Wayanad chu August 12-13 hian a tlawh dawn niin party general secretary KC Venugopal chuan Thawhlehni khan a sawi a, hei hi parliament member-a dah a nih leh hnua a tlawh hmasak berna tur a ni ang.
Gandhi-a hi Lok Sabha secretariat chuan Thawhtanni khan MP atan a dah thar leh a, a hma lawkin Supreme Court-in mi tihhmingchhiat thubuaia hremna a pek chu a tihkhawtlaisak a ni.
“August 12-13 hian Pu Rahul Gandhi-a’n a bial, Wayanad a tlawh ang! Wayanad mipuiten mipui rorelnain hnehna a chang tih an hre tawh a, parliament-ah aw an nei veleh ta! Pu Rahul-a hi MP a ni satliah lo va, an chhungkaw zinga mi a ni,” tiin Congress General Secretary Venugopal hian Twitter-ah a tar lang a ni.
Gandhi-a hi March 24 khan Gujarat-a Surat court chuan Modi tih hmingpu zawng zawng a tihmingchhia nia puhnaah thiam loh chantirin Lok Sabha MP a nihna pawh hlihsak a ni.
July 7 khan Gujarat High Court hnenah an hremna chu tikhawtlai turin a ngenna a hnawlsak a; mahse, court sang berah kal lehin July 15 khan tihkhawtlaisak a remti ta a. MP-ah pawh dah let leh a ni a, nakum inthlan pawh a chuh thei ang.