ZPM thalaiin ZPM party chu Mizorama political party zinga BJP la thawhpui lo awm chhun party a nih thu an sawi.
Nimina ZPM thalai hruaituten Aizawl Press Club-a chanchinbumite an kawmnaah an vice president, Laltanpuia Zote chuan Pathian khawngaihna avangin ZPM boruak a lian zel a, an party thangduang lutuk chu party dangin helhin nasa takin an bei a, rem leh rem loin BJP leh ZPM chu sawi zawm an tum nasa hle tih a sawi a, “Hetiang politics game hi ram hlui politics ze dik takah kan ngai,” a ti.
BJP leh ZPM sawi zawm tumtu, Congress party chu kum 2018-a CADC inthlanpui neih tum khan a mala sorkarna an siam theih loh avangin United Legislature Alliance tia hming vuaha BJP party lo thawhpui tawhtu an nih thu sawiin, Mizoramah Congress party chu Mizorama BJP a chhiat ber lai pawha lo tuamhlawmtu leh lo thawhpui duhtu an ni tih a sawi.
ZPM thalai vice president chuan Congress party chu party dang dawt hmanga beih a din chhuah leh tum ai chuan, kum 20 chuang sorkârna an lo chelh tawh avanga Mizoram mipui an intodelhna tura an thawh dante, term liamtaa zu zawrh Zoram mipuiin kan thatpui dante leh an hmachhawpte sawi zawk turin an ngen tih a sawi.
ZPM thalai hruaitute chuan Manipur-a BJP sorkar hnuaiah Zohnahthlakten harsatna tam tak an tawh mêkna kâra MNF-in BJP a thawhpuina tihtawp a la tum lo leh an MP pahnihte pawh parliament-ah BJP karah an la thu reng chu zahthlak an tih thu an sawi.
Congress leh MNF hian thuneihna an chana lalna an chan theih phawt chuan eng party pawh lungsi takin an thawhpui thei zel a, Kristiante tâna party hlauhawm, BJP thawhpui hi engtik lai pawhin an inring reng tih ZPM thalai hruaitute chuan an sawi bawk.