Aizawl: Mizoram State Disaster Management Authority chu an chairman, Zoramthanga, Chief Minister ho a nimina thukhawmin Vaivakawn Zohnuai kawngpui leh a chhehvel leiminin a tlakbuak mek chungchang leh Tlabung RD Block chhunga tui lian leh lei min vanga harsatna tawh mekte chungchang an sawi ho.
CM Conference Hall-a thutkhawma tar lan dan a nih danin Vaivakawn Zohnuai leilung awm dan hi tuna a tihnep theihna tur chi hmalakna hrang hrang kalpui nghal a nih bakah, nakina tha taka kawngpui kaltlangtir leh theihna tura ruahmanna siam a ni a. Ruahmanna hi National Disaster Management Authority-ah thlen tura tih a ni.
Tlabung leh a chhehvel khuaah hian tui lian vang leh lei min vanga hmun hima sawn chhuahte chen lailawkna tur hi Lunglei DC leh Tlabung SDO hmangin ngaihtuah nghal a ni a, harsatna dang heng buhfai supply-te, power supply-te, inbiakpawhna kawngah harsatna a thlen belh loh nan hmalak zui mek a nih thu tar lan a ni.
Lawngtlai district khawthlang lamah pawh tui lian vanga harsatna a awm nia hriat a ni a, District Disaster Management Committee atanga report ngaihchan mek niin a tul anga hma la nghal tura inbuatsaih a nih thu tar lan a ni bawk.
Thutkhawmah hian Mizoram State Disaster Management Plan, 2023, district hrang hrangte Disaster Plan, 2022 te an pawm (approved) bakah SDMA Work Plan, 2023 leh Purchase of Disaster Management Equipments proposal te pawm a ni.
He hunah hian Lalchamliana, Vice Chairman & Minister, DM&R; Dr. Renu Sharma, CEO & Chief Secretary leh SDMA member dangte an tel.