Colombia in FIFA Women’s World Cup quarter-final ah England an hmachhawn dawn a. Last 8 lut tur hian Jamaica lakah 1-0 in hnehna an sualchhuak.

Melbourne Rectangular Stadium-ah Thawhlehni khan round of 16 inkhelah hian Colombia captain Catalina Usme chuan an chakna goal pawimawh hi a khung a. Minute 51-naah a pet kual lut mawi hle.

He goal hi Jamaica in tun tournament-ah minute 321 chhunga an chhuah hmasak ber a ni a, amaherawhchu hun pawimawh lai takah an sut thei lova, a chhanletna tur an neih loh an tuar.

Colombia hian a vawikhatna atan hmeichhe World Cup-ah hian a sang pariat zinga an telna a ni a. Inrinni tlaiah European champion ni lai nen an inkhel ang.

Tleirawlte an inlar

Melbourne in kumin World Cup-ah hian hmeichhe football a team liante a vel ngun tawh hle a, Olympic champion Canada, legend Marta te ram Brazil leh vawi li champion tawh USA te helai hmunah hian an tla vek.

Chutihrualin thangthar te invawrhna hmun a ni thung a, hmeichhe football a player beiseiawm leh star lar ni vat turte an langsar.

Heng zingah hian Colombia chhuanvawr Linda Caicedo chu hmahruaitu zing ami a ni a, kum 18 mi hi Colombia chakna niin Jamaica lakah pawh a pawimawh. Ani bakah fullback pawimawh Manuela Vanegas aia khel Ana Maria Guzman pawhin fak a hlawh hle.

Colombia coach Nelson Abadia chuan, “Colombia hmeichhiate tana hun pawimawh tak kan thleng a, South American football tan pawh hlu tak a ni. Huaisenna leh tlo na, takna neih tum a bei ngat ngat thinte an hlawhtling a, kan chak dan duhthusam a ni.” tiin inkhel zawhah a sawi a. England lakah pawh an tan inthlahdah a thiang lo tih a sawi tel.

France chak chiang

France in Women’s World Cup quarter-finals awlsam angreng takin an lut a. Beisei khum a che tha Morocco lakah 4-0 in an chak.

Adelaide a Hindmarsh Stadium a inkhelah hian France tan Eugenie Le Sommer chuan goal hnih a khung a. Kadidiatou Dianni leh Kenza Dali ten goal dang khung bawkin France an chungnung.

Quarter-final ah a thlengtu Australia an hmachhawn leh ang.

Morocco zinkawng a tawp

Africa ram zinga Women’s World Cup a knockout stage inkhel a hnehna chang hmasa ber nih tumin Morocco in an bei a. Group stage a an inkhelin fak a hlawh thin.

Chutihrualin team tha France lakah erawh hmabak a ko dawn tih hriatsa a ni.

France tlarhma hlauhawmzia inkhel tan atang lang nghalin first half-ah goal thum an khung a. Sakina Karchaoui cross atang Dianni in an goal hmasa ber a tauh luh hnuah Aston Villa midfielder Kenza Dali khung tur a siamsak ve leh nghal a.Le Sommer inlar in an goal hnuhnung pahnih a khung ve leh bawk.

France hi World Cup-ah palina aia sang la ni ngai lo an ni a, nimahsela World Cup hnuhnung pali ah quarter-final an la lut vek.

Coach Herve Renard chuan, “Kan hmabak hi chiang takin kan hria. A thlengtu ram hmachhawn hi a hautak rualin hman thiam theih a ni bawk. Hei vang hian Australia hian pressure an nei dawn.” tiin an inkhel tur a thlirlawk.