Aizawl: Khawthlangtuipui chim chinin san lam a pan zel avangin Tlabung leh a chhehvel khaw dang pakuaa chhungkaw 345-te chu an chenna in chhuahsanin hmun him lamah an insuan lut tawh.
Tlabung khaw chhung bikah tui lian vanga hmun him lama insawn chhuak zat chu an vaiin chhungkaw 90 an tling tawh a, tui lian vanga mahni chenna in chhuahsan ngaite chu Tlabung SDO (C) ruahmannain zirna in, sorkar building ruak remchang leh vantlang hall-a an inthiar luh bakah mahni chhungte pana anmahni fin lailawk chhungkaw eng emaw zat an awm bawk.
Tlabung chhehvel khaw dang pakuaah pawh tui lian vangin chhungkaw 256-te chu hmun him lamah insaseng tawhin, lei min vanga chenna in rauhsan chhungkaw hnih nen, Tlabung leh a chhehvel khaw 10-a tui lian leh leimin vanga hmun him lam pana insaseng chhungkaw 348 an awm mek.
Tlabung khaw chhung bika chenna in chhuahsana hmun him lam beltute hi tui len tirh atanga a hmun thutchilhtu, Tlabung SDO (C) H Zonunmawia chuan a khat tawka tlawh kualin mamawh leh tlakchham an neihte a ruahmansak zel a ni.
Khawthlangtuipui lian hian chenna in bakah infiamna hmunhma tiamin vantlang hmun pawimawh dang a chim nual tawh a, in thenkhat phei chu a chim pil tawh a ni.
Tlabung khaw chhunga tui lian tuarte chu YMA : Tlabung branch-in hnatlanga kohva thawkchhuakten an bungrua senghawipuiin mi thahnem tak chuan Thawhtanni zan khan tlaivarin tui lian tuarte an buaipui a ni.
Bialtu MLA Nihar Kanti Chakma pawhin tui lian tuarte chhawmdawl hna kalpui dan enpuiin hmun hrang hrang a fang a; hmun hima insuan lutte hnena sem turin buhfai bag 10 a ruahman nghal.
Hetihlai hian Lunglei leh Thingfal inkarah pawh ruahsur nasa avanga lei min a tam a, Thualthu leh Bualte inkarah pawh lirthei eng emaw zat khualzin leh bungraw phur an tangkhang a, an ei tur hi Thualthu YMA-ten siamsakin Miriam L.Hrangchal chuan sum leh pai a tum thung a ni.