SEDP Executive Board Chairman Tawnluia, deputy chief minister hoa nimina thukhawm chuan chhungkaw lam hawi (family oriented) SEDP thawh hnihna first instalment chu September, 2023 ral hmaa sem chhuah vek hman an rel.
Planning & Program Implementation Department Committee Room-ah thutkhawmah hian Tawnluia chuan SEDP Executive Board thukhawm chu sorkar flagship program SEDP kenkawhna kawnga pawimawh ngaihtuahtu leh roreltu a nih thu sawiin, “Sorkar pawhin a ngai pawimawh hle a ni,” a ti a. Board member leh line department hrang hrangte chu flagship program tihhlawhtlin kawnga theihtawp chhuah turin a chah.
Thutkhawma tar lan a nih danin, SEDP thawh hnihna (phase 2)-ah hian a dawngtu tur 60,000-te thlan chhuah leh tur a ni a. MLA bial tin atanga chhungkua 1,400 thlan kaltlangin hamthatna dawngtu 56,000 an awm thei dawn a; heng baka chhungkaw 4,000 dangte chu MLA bial lian deuha pek belh emaw, a mamawh zual chhungkuate SEDP Governing Board remtihnaa pek tur a ni.
Chhungkaw lam hawi SEDP thawh hnihna hi instalment hniha then a ni a. First instalment-ah hian tanpuina Rs. 25,000 theuh an dawng hmasa phawt dawn a, second instalment-ah Rs. 25,000 an dawng leh dawn a, tanpuinate hi line department-te kaltlanga sem chhuah tur a ni a. Thawh hnihna hnuaia first instalment hi a tul ang angte tihfel a nih hnuah September, 2023 ral hma ngeia sem chhuah vek hman tum a ni.
Thutkhawmah hian Mizoram State Planning Board Vice Chairman H. Rammawi, SEDP Executive Board Member MLA te, Planning & Programme Implementation Department leh Finance Department hotute bakah SEDP kalpuitu line department hotute an tel a ni.