Aizawl : Aizawl South II Block MAHILA Political Training hmanpuitu MPCC Treasurer Dr Lalmalsawma Nghaka chuan kumin MLA inthlan lo awm tura Congress manifesto pakhatna ‘Tang Puihna’ chu tum ruh taka hnathawk mite dinchanna rama siam tumna a nih thu a sawi.
Thakthing Zawlbuk, Thakthing venga nimina hun hmanah Dr Lalmalsawma Nghaka chuan, “Tang Puihna policy hmangin Mizoram mipuite hi Japan, South Korea leh Singapore ram mipuite anga tih takzet leh hlawhtling thama hnathawk hnama siam tumna leh rinawm leh nasa taka hnathawk mekte chawikan tumna policy a ni,” a ti.
Tang Puihna chu mipuite thawkho thiam tura inzirtir tumna a nih bawk thu sawi Dr. Lalmalsawma Nghaka chuan, “Society leh Self Help Group leh PACS kaltlanga awmze nei zawka kan thawhrim rah kan seng theih nana duan a ni tel bawk,” a ti bawk.
Dr Lalmalsawma Nghaka chuan mi zawng zawng tana sorkar hna thawh theih a nih loh avangin, Mizo thalaite an mahni thiam thil, an tuina lamah eizawnna siam sak theihna kawng sial nan ‘Tang Puihna’ policy hi duan a ni a. Thalaite’n khawvel zau zawka an thalaipuite’n an hmasawnna an hmuh mek ang hi Mizoramah ngei an hmuh ve theih nana kawng sial tumna a nih thu a sawi.
He hunah hian MAHILA Resident Vanlalawmpuii Chawngthu, ex-MLA, Rosiamngheta, AMC Corporator, Meriam L. Hrangchal, Secretary MPCC leh H. Lalduhawma, President, Aizawl S-II Block te’n thu an sawi bawk.