Greek thliarkar, Evia chu ram kang mekin a tuam zui zel a, a mi chengte chu tuipuiah lawng hmangin an inthiar chhuak mek zel.
Mi 2,000 chuangin a hmain an lo chhuahsan tawh a, kum upate chu lawng hmanga thiar chhuah leh an ni.
Tual chhung thuneitute chuan ram kang thelh tur hian puihna an la mamawh belh zel tih an sawi a, thliarkar hmun tam tak a kang chhe tawh niin an sawi.
Greece ram hian kum 30 chhunga khaw lum ber hun an tawng mek a, 45°C laite a tling.
Tun hnaiah an ram chhung hmun tam takah ram a kang a. A lian tham leh an buaipui nasat tak, Athens hmar lam dai kang erawh a ziaawm tawh.
Khaw lum tak leh mihring khawsak phungin a siam sik leh sa inthlak pawh an tawrh zui zel hmel a. Khaw lum leh ro, ram kan duhna boruak la awm zui tura ngaih a ni.
Athens hmar lam leh khawchhak lama awm, Evia thliarkarah hian hmun hnihah ram a kang a, hei hian ram hectare sang chuang kang chhe tawhin in leh sumdawnna hmun a chhe teuh tawh bawk.
Kangthelhtute chuan khaw tam takah kang thelh tumin theihtawp an chhuah a. Hetih lai hian Pathiannia thlalak thehdarhah chuan kum upate chu lawng hmangin hmun him lamah suan mek a ni tih a lang.
Kangmei hian ziaawm lam a la pan mai hmel loh avangin thuneitute leh a mi chengte chuan puihna an mamawh tih an sawi.
Thliarkar hmar lam, Istiaia Mayor Giannis Kontzias chuan, “Tunah chuan a tlai tawh, helai vel hi a chhe vek tawh,” tiin tual chhung chanchinbute a hrilh.
Tui phur thlawhna leh helicopter an mamawh thu a sawi.
Hetih lai hian Civil Protection Chief Nikos Hardalias chuan thlawhna hi awm mah se khaw hmuh theih chin a tawi em avangin thelh tura chet chhuah a harsa hle tih a sawi.