• Ruata

Honda chuan 160cc huanga a pathumna ni turin SP160 bike an tlangzarh a, Rs. 1,17,500 atanga Rs 1,21,900 man inkar a ni dawn a ni.

Lirthei man to tak tak kan ziak nasa khawp mai a. Tun tumah chuan bike-ah pawh a man tlawm leh tui heh lo, tha bawk si, a thar a lo chhuah thu kan han tarlang a ni a. Honda company hlun leh rintlak tak hnuaia hetiang 160cc bike mawi leh tha tak mai a lo chhuak leh hi thil tha tak a ni a. Mamawhtute tan chuan a hlu hle a ni. Tichuan Honda bike ho line-up-ah chuan SP160 hi Unicorn leh XBlade inkarah a awm a, a mawiin a design pawh a felfai a. Bike hralh kal tak te pawh a nih chhoh a beiseiawm hle a ni.

A khawl

He bike thar hi a nghahchhan lamah chuan thil thar lutuk a ni lo a tih theih a. A khawl leh a frame innghahna hi Unicorn ta ang a rawn tawm a. A khawl hi 162cc single cylinder khawl niin 13.5hp power leh 14.6Nm torque a pechhuak thei a ni. Honda XBlade pawh hian he khawl tho hi a hmang nain a power leh a torque tam turin her danglam (tune) a ni thung a. Khawl thuhmun hmang ni mahse a man to hret XBlade te hi chu a chak daih thung a ni.

SP160 hian sports bike pian te ang a nei lutuk lo a. Bajaj Pulsar N160 leh TVS Apache RTR 160 4V te nen pawh a power figure lam chu a intluk lemlo a, Pulsar P150, Yamaha FZ leh Suzuki Gixxer leh adangte nena inel tur deuha ngaih a ni.

Kentel hrang hrang

Honda hian an bike dangte nena inang leh inzul lutukin SP160 hi an design hran lo a. A design hi a danglam deuh a, a te zawk, SP125 te nen a design pawh a inang deuh a, mahse SP160 chu a lian zawk a ni. A hma bawr pawh SP125 nen hian a inang viau mai a, a hnunglam bawrah chuan a danglam daih thung a ni.

Honda Unicorn pawh a mawi viau a, SP160 nena khaikhin pawhin a inang lo deuh a. Hetihrual hian SP design leh styling vel hi a tunlaiin thalai lam duhzawng a rawn awn viau mai a. A tank extension te a lian deuh a, a panglam design pawh a ki deuh bawk a. A LED lighting leh fully digital instrumentation a neih hian Unicorn aiin a ti chungnung zawk hle a, a changkang viau a ni.

A LCD display hi lian tak chu a ni lo na a, information hrang hrang a entir fiah viau thung a. Speedometer, tachometer leh gear position indicator a awm bakah trip leh fuel chungchang data pawimawh hrang hrang a hmuh theih bawk a. Bluetooth connectivity erawh kan hmu rih lo thung a ni.

Thildang

Honda SP160 hi diamond-type frame nghahchhana duan a ni a, hei hi kan sawi tawh angin Honda Unicorn neih ang tho a ni a, suspension lamah chuan a hmalamah telescopic fork leh a hnunglamah monoshock te a awm a. Unicorn nena khaikhina danglamna pakhat chu 17-inch wheel a hmang hi a ni a, Unicorn-ah chuan 18inch kan hmu thung a ni. Hei bakah hian SP160 tyre hmang hi a lang hraw zawk viau a, a hmalamah 80/100-17 leh a hnunglamah 130/70-17 te a hmang a ni.

A man leh elpui

Honda SP160 hi chi hnih: Single disc version, Rs Nuai 1.18 man, 130mm rear drum brake hmang leh Deluxe variant Rs Nuai 1.22 man, 220mm rear disc brake hmang te a awm a. A pahnih hian 276mm front disc brake a hmang a, single-channel ABS a nei bawk a ni. A elpui tur hrang hranga ngaih bike dangte hi kan lo tarlan tawh angin Yamaha FZ (Rs Nuai 1.16 man), Suzuki Gixxer (Rs Nuai 1.35 man), Pulsar P150 (Rs Nuai 1.20 man) leh TVS Apache RTR 160 2V (Rs Nuai 1.19 man) te an ni.